Трамп Зеленский «мағлуб бўлаётгани» ва буни «қабул қилиши» кераклигини айтди

АҚШ президенти Доналд Трамп Politico нашрига катта интервю берди. Унинг маълум бир қисми Украина – Россия уруши ҳақида бўлди. Meduza унинг муҳим гапларидан қисқа иқтибослар келтирди.

- [Украина президенти Володимир] Зеленский ишга киришиши ва воқеликни борича қабул қилишни бошлаши керак, чунки у мағлуб бўлмоқда.

- Украина урушда ютқаздими? Биласиз, мен 10 ой бурун Оқ уйга қайтишимдан олдин ҳам улар қирғоқнинг бир қисмини, катта қисмини йўқотган эди. Хариталарга қаранг. Ҳозир - янада кўпроқ. Улар кўп ерларини йўқотди ва бу улар йўқотган жуда яхши ерлар. Буни ғалаба деб аташ қийин, албатта.

- Қайси давлат ҳозир кучлироқ музокара позициясида? Шубҳасиз, бу Россия. У анча катта. Россия билан ҳар доим осон бўлмаган, унинг устунлиги бор ва ҳар доим бўлган. У анча катта, шу маънода анча кучли. Мен Украинага, унинг халқига, ҳарбийларига уларнинг жасорати, кураши учун ўз ҳурматимни билдираман. Лекин, биласизми, қайсидир нуқтада одатда куч ғалаба қозонади.

- Бу менинг урушим эмас. Бу Жо Байден уруши. Бу мени чиндан ҳам ташвишга солаётганининг ягона сабаби шундаки, мен ёш, чиройли одамларни ўлдиришларини кўришни истамайман.

- Зеленский ажойиб савдогар, мен уни «Ф.Т.Барнум» деб атайман, у ер юзидаги энг буюк одамлардан бири эди, у ҳар қандай нарсани ҳар кимга сота оларди. Зеленский Жо Байденни унга 350 миллиард доллар ажратишга кўндирди. Қаранг, бунинг оқибати нима бўлди, унга қанчага тушди. Мамлакатининг тахминан 25 фоизи йўқотилди.

- Аммо, Байденга нисбатан адолатли гапирайлик, Қримни Барак Обама бериб юборди. Украинада сайловлар ўтказиш вақти келди - улар анчадан бери бўлмаган ва бу унчалик тўғри эмас. Ким ғалаба қозонишини билмайман, балки Зеленскийдир, лекин Украина халқида танлов бўлиши керак. Улар демократия ҳақида гапиришади, лекин иш шу даражага бориб етдики, бу энди демократия эмас. Бу уруш бўлмаслиги керак эди, агар мен президент бўлганимда, у бошланмаган ва тўрт йил давом этмаган бўларди. Агар мен президент бўлмаганимда, бизда аллақачон Учинчи жаҳон уруши бўлиши мумкин эди.