Нетаняҳу: Австралия антисемитизмга қарши курашмаяпти

Сиднейда яҳудий жамоаси аъзоларига қарши ўлимга олиб келган ҳужумдан кейин Исроил бош вазири Бинямин Нетаняҳу Австралия ҳукуматини антисемитизмга қарши етарлича курашмаётганликда айблади. У якшанба куни, 14 декабрда шундай деди: “Австралия ҳукуматининг сиёсати Австралияда антисемитизмга хизмат қилади ва уни рағбатлантиради”. У бу ҳақда тўрт ой аввал Австралия бош вазири Энтони Албанезега йўллаган мактубида огоҳлантирганини билдирди.

Исроил бош вазири Австралия бошқа давлатлар билан бирга Фаластин давлатини тан олганини эслатиб, бу билан мазкур мамлакат бош вазири “антисемитик оловга мой сепаётгани”ни таъкидлади. Нетаняҳунинг айтишича, бу қадам АҚШ ва Европа Иттифоқи ҳамда қатор давлатларда террорчи деб тан олган ҲАМАС гуруҳи жангчиларини рағбатлантиради. Шунингдек, бу қарор “австралиялик яҳудийларга таҳдид қилаётган ва яҳудийларга нисбатан нафратни — ҳозир сизларнинг кўчаларингизда тарқалаётган нафратни қўллаб-қувватлаётганларни” кучайтиради, дея қўшимча қилди Нетаняҳу.

Исроил раҳбари антисемитизмни саратон ўсмасига қиёслади. “Сиз мамлакатингизда ўсиб бораётган саратон ҳужайраларини тийиш учун ҳеч нарса қилмадингиз, бирор чора кўрмадингиз, — дея Албанезени айблади у. — Сиз касалликнинг тарқалишига йўл қўйдингиз ва натижада бугун биз кўрган яҳудийларга қарши даҳшатли ҳужумлар содир бўлди”.

Шу билан бирга, Нетаняҳу ҳужумчилардан бирини қуролсизлантирган тасодифий йўловчининг ҳаракатларини олқишлади. Маълум бўлишича, у “жасур мусулмон” бўлган, дея қўшимча қилди у. Нетаняҳу Австралияни антисемитизмга қарши қатъий чоралар кўришга чақирди. Исроил буни Ғарбдаги ҳар бир ҳукуматдан кутмоқда, “чунки бу касаллик тарқаляпти ва сизларга ҳам юқиши мумкин”, деди у.

Аввалроқ Сиднейдаги машҳур Бонди-бич пляжида Ханука байрамини нишонлаётган яҳудий жамоаси аъзоларига икки шахс ҳужум қилгани оқибатида 16 киши ҳалок бўлган, улар орасида эҳтимолий ҳужумчилардан бири ҳам бор. Иккинчи шахс яраланган ва оғир аҳволда — у қўлга олинган. Яна 40 киши, улардан икки нафари полициячилар, яраланган.

Ижтимоий тармоқларда, эҳтимол, тасодифий йўловчи томонидан тасвирга олинган видео тарқалган: унда эркак киши ҳужумчилардан бирини қуролсизлантириб, кейин қуролни унга қаратгани кўринади. Ҳужум яҳудий жамоасининг “Денгиз бўйида Ханука” тадбири вақтида содир бўлган, ўша пайтда пляжда юзлаб одам, жумладан кўплаб болали оилалар тўпланган эди.

Отушма “Хануканинг биринчи кунида Сидней яҳудий жамоасига қарши атайлаб йўналтирилган” бўлган, деди штат бош вазири Крис Миннс, бу ҳужумни террорчилик акти деб атаб.

Австралия Буюк Британия ва Канада билан бирга сентябр ойи охирида Фаластин давлатини тан олган. Австралия ҳукумати раҳбари бу чорани “икки давлат тамойили асосида келишув жараёнига янги туртки бериш бўйича мувофиқлаштирилган халқаро саъй-ҳаракатларнинг бир қисми” деб атаган. “ҲАМАС Фаластинда рол ўйнамаслиги керак”, — деган Энтони Албанезе. Унинг айтишича, Фаластин автономияси вакиллари Австралияга “Исроилнинг мавжуд бўлиш ҳуқуқини тан олиши”ни маълум қилган.