Германия Украинага инвестиция киритиш бўйича янги дастурни бошлаяпти

Германия ҳукумати янги молиялаштириш инструменти ёрдамида немис компанияларининг Украинага инвестицияларини жалб қилиш ниятида. Дастурнинг дастлабки ҳажми 45 млн евро этиб белгиланган бўлиб, уни бошқариш KfW (Kreditanstalt für Wiederaufbau) — давлат тараққиёт банки орқали амалга оширилади. Бу банк Иккинчи жаҳон уруши тугаганидан кейин Германияни тиклашни молиялаштирган. Германия иқтисодиёт вазири Катерина Райхе 15 декабр, душанба куни Берлинда журналистларга шу ҳақда маълум қилди.

Унинг айтишича, UkraineConnect деб номланган ушбу дастур доирасида хусусий сектордан салмоқли маблағларни жалб қилиш кўзда тутилган. Барча соҳалардаги манфаатдор компаниялар Украинадаги лойиҳалар учун имтиёзли кредитлар олиши мумкин бўлади.

Янги инструмент аввалги иқтисодий ёрдам дастурларини тўлдириши керак. Булар қаторига инвестиция ва экспорт кредитлари учун давлат кафолатлари, шунингдек энергетика соҳасидаги ёрдам киради. Декабр бошида Германия иқтисодиёт вазирлиги Россия бошлаган уруш пайтида вайрон қилинган энергетика инфратузилмасини тиклаш учун Украинага яна 100 млн евро ажратишини (бу йил аввал эълон қилинган 60 млн еврога қўшимча равишда) маълум қилган.

Германия–Украина иқтисодий форумида, хусусан, Россия билан тинчлик келишуви тузилса, Украина тикланиши мавзуси муҳокама қилинди. Шу билан бирга, мудофаа соҳасида ҳамкорликни мустаҳкамлаш масаласи ҳам кўтарилди. Форум ишида Украина президенти Володимир Зеленский ва Германия канцлери Фридрих Мерц ҳам иштирок этган.

KfW банки 1948 йилда ташкил этилган. Унинг 80 фоиз улуши Германия Федератив Республикасига, 20 фоизи эса федерал ерларга тегишли. KfW — дунёдаги энг йирик тараққиёт банкларидан бири.

KfW фойда олишга йўналтирилмаган ва оддий тижорат банки каби ишламайди: унда хусусий мижозлар учун филиаллар йўқ, молиялаштиришни эса асосан облигациялар чиқариш орқали жалб қилади.

KfW'нинг асосий вазифаси — иқтисодиёт ва жамиятни қўллаб-қувватлаш. У кичик ва ўрта бизнес, уй-жой қурилиши, таълим, инновациялар ва “яшил” лойиҳалар учун имтиёзли кредитлар ҳамда кафолатлар беради, шунингдек халқаро тараққиёт дастурларини молиялаштиради. Германия KfW орқали иқтисодий, ижтимоий ва иқлим сиёсатини амалга оширади.