Хусусий секторни ривожлантириш Ислом корпорацияси ANOR BANK'ка молиялаштириш линиясини тақдим қилди

Жидда, Саудия Арабистони – 2025 йил 22 декабр – Ўзбекистоннинг етакчи рақамли банкларидан бири бўлган ANOR BANK Хусусий секторни ривожлантириш Ислом корпорацияси (ХСРИК) билан молиялаштириш тўғрисида битим имзолади. Ушбу келишув доирасида ХСРИК томонидан 10 миллион АҚШ доллари миқдорида молиялаштириш линияси ажратилади.

Мазкур маблағлар Ўзбекистондаги кичик ва ўрта бизнес субъектларини қўллаб-қувватлаш, шунингдек, хусусий сектор учун исломий молия воситаларидан фойдаланиш имкониятларини кенгайтиришга йўналтирилади.

Ушбу молиялаштириш ANOR BANK’нинг стратегик мақсадларига тўлиқ мос бўлиб, хусусан кичик ва ўрта бизнесни ривожлантириш, хусусий тармоқни молиялаштириш ҳажмини ошириш, исломий молияни кенг жорий этиш ҳамда Ўзбекистон иқтисодиётини диверсификация қилишга хизмат қилади.

Мазкур ташаббус Хусусий секторни ривожлантириш Ислом корпорациясининг аъзо давлатларда барқарор иқтисодий ўсишни таъминлаш, хусусий тармоқни ривожлантириш ва тадбиркорликни қўллаб-қувватлашга қаратилган стратегиясига тўлиқ мос келади.

Битим Хусусий тармоқни ривожлантириш Ислом корпорацияси бош ижрочи директори вазифасини бажарувчи Dr. Khalid Khalafallah ҳамда ANOR BANK бошқаруви раиси Шерзод Акрамов томонидан имзоланди.

Мазкур келишув ХСРИК томонидан ANOR BANK’ка тақдим этилган илк молиялаштириш линияси бўлиб, у Ўзбекистонда хусусий тармоқни ривожлантириш йўлида муҳим стратегик қадам ҳисобланади. Ушбу ҳамкорлик келгусида янги инвестицияларни жалб қилиш ва узоқ муддатли шерикликни мустаҳкамлаш учун замин яратади.

ANOR BANK ҳақида

“ANOR BANK” АЖ 2020 йилда ташкил этилган бўлиб, Ўзбекистондаги энг тез ривожланаётган рақамли банклардан бири ҳисобланади. Банк бугунги кунда 17 та савдо офиси ҳамда рақамли каналлар орқали чакана ва корпоратив мижозларга кенг қамровли банк хизматларини тақдим этиб келмоқда.

ANOR BANK замонавий технологик ечимлардан фойдаланган ҳолда кичик ва ўрта бизнес ҳамда жисмоний шахслар учун қулай ва тезкор молиявий хизматларни таклиф этади. Банк таълим, экология ва ижтимоий ривожланиш йўналишларида лойиҳаларни амалга ошириб, жумладан чекка ҳудудларда молиявий саводхонликни оширишга алоҳида эътибор қаратиб келмоқда.

Хусусий секторни ривожлантириш Ислом корпорацияси ҳақида

Хусусий секторни ривожлантириш Ислом корпорацияси (ХСРИК) — Ислом Тараққиёт банки (ИТБ) гуруҳи таркибига кирувчи кўп томонлама молиявий институт бўлиб, аъзо мамлакатларда хусусий тармоқни ривожлантириш ва иқтисодий ўсишни рағбатлантириш мақсадида Шариат тамойилларига мувофиқ молиялаштириш ҳамда инвестиция хизматларини тақдим этади.

Шунингдек, ХСРИК давлат ва хусусий ташкилотларга маслаҳат хизматлари кўрсатиб, бизнесни ривожлантириш, кенгайтириш ва модернизация қилишга кўмаклашади.

ХСРИК халқаро рейтинг агентликлари томонидан юқори баҳоланган:

Moody’s – A2, Fitch – A+, S&P – A.

Реклама ҳуқуқи асосида