Ноқулай об-ҳаво сабаб қатор авиарейслар муқобил аэродромларга йўналтирилди

Айрим аэропортларда кузатилган ноқулай об-ҳаво шароити туфайли бир нечта авиарейслар хавфсизлик нуқтаи назаридан муқобил аэродромларга қўндирилди. Жумладан, Самарқанд, Тошкент ва Нукус аэродромлари муқобил манзил сифатида танланган.

Фото: Uzbekistan Airports (архив фото)

Ноқулай об-ҳаво шароити сабаб қуйидаги рейслар муқобил аэродромларга йўналтирилди:

Fly Khiva авиакомпаниясининг Мадина — Қарши йўналишидаги 2U7623 рейси — Самарқанд муқобил аэродромига;

Centrum Air авиакомпаниясининг Жидда — Бухоро йўналишидаги C63316 рейси — Самарқанд муқобил аэродромига;

Uzbekistan Airways авиакомпаниясининг Қозон — Фарғона йўналишидаги HY9652 рейси — Тошкент муқобил аэродромига;

Ural Airlines авиакомпаниясининг Москва — Қарши йўналишидаги U62457 рейси — Самарқанд муқобил аэродромига;

FlyOne авиакомпаниясининг Жидда — Фарғона йўналишидаги 7Q2242 рейси — Тошкент муқобил аэродромига йўналтирилди.

Шунингдек, Қарши аэропортидаги об-ҳаво шароити туфайли Uzbekistan Airways’нинг Москва — Қарши йўналишидаги HY9624 рейси экипажи Самарқанд муқобил аэродромига йўл олишга қарор қилган.

Бундан ташқари, Урганч аэропортидаги ноқулай об-ҳаво сабаб Uzbekistan Airways’нинг Тошкент — Урганч йўналишидаги HY51 рейси экипажи Нукус муқобил аэродромига қўнишга қарор қилган.

Авиайўловчилардан рейслар бўйича янгиланган маълумотларни авиакомпаниялар ва аэропортларнинг расмий манбалари орқали текшириб бориш сўралмоқда.