Эрон сўнгги шоҳининг ўғли халқни шаҳарларни эгаллаб олишга чақирди

Шаҳзода Ризо Паҳлавий «инқилоб ғалаба қилган куни» ватанга қайтиш ва халқ билан бирга бўлишга тайёргарлик кўраётганини айтди.

Фото: Grey Hutton / DER SPIEGEL

Эрон сўнгги шоҳининг ўғли шаҳзода Ризо Паҳлавий мамлакат аҳолисини умуммиллий иш ташлашлар ўтказиш ва норозилик намойишчиларига шаҳарларни эгаллашда ёрдам беришга чақирди.

«Мақсадимиз шунчаки кўчаларга чиқиш эмас, мақсадимиз шаҳарларни эгаллаш ва ҳимоя қилишга тайёрланиш. Бу мақсадга турли йўналишлардан фойдаланиш, шаҳарларнинг марказий ҳудудларида кўпроқ одам тўплаш ва турли аҳоли қатламларини бирлаштириш орқали эришиш зарур», — деди Ризо Паҳлавий X тармоғидаги мурожаатида.

У шунингдек, ҳарбийларни «қатағон машинаси»ни заифлаштириш ва «уни бутунлай ишдан чиқариш учун» халқ тарафига ўтишга чақирди.

Шаҳзода «инқилоб ғалаба қилган куни» ватанга қайтиш ва халқ билан бирга бўлишга тайёргарлик кўраётганини айтди.

«Бу кун яқин қолганига ишонаман», — дея қўшимча қилди у.

Эронда декабр ойи охиридан бошланган норозилик намойишлари бутун давлат бўйлаб кенг тарқалмоқда. Полиция минглаб одамларни қўлга олган, 200дан ортиқ инсон ҳалок бўлгани айтилмоқда.

Тайёрлаган Дилшодбек Асқаров

#Эрон #Ризо Паҳлавий

Эронда иқтисодий инқироз туфайли бошланган оммавий намойишлар сўнгги йиллардаги мамлакатдаги энг жиддий антиҳукумат протестларга айланиб кетди. Расмийлар йирик шаҳарларда интернет ва телефон алоқасини узиб қўйди. Намойишчилар режим ағдарилиши ва шоҳнинг қайтишини талаб қилмоқда.