АҚШ Ўзбекистон фуқароларига ҳам иммиграцион виза беришни тўхтатди

АҚШ президенти маъмурияти 75 та давлат фуқаролари учун иммиграцион визалар бўйича аризаларни кўриб чиқишни тўхтатмоқда. Бу – Вашингтоннинг иммиграцияга қарши чораларни кучайтиришининг бир қисми ҳисобланади.

АҚШ Давлат департаменти матбуот котибининг айтишича, бу танаффус айрим Лотин Америкаси мамлакатлари, Босния ва Албания каби Болқон давлатлари, Покистон ва Бангладеш каби Жанубий Осиё мамлакатлари, Ўзбекистон ва Қозоғистон каби Марказий Осиё давлатлари ҳамда Африка, Яқин Шарқ ва Кариб ҳавзасидаги кўплаб давлатлар фуқароларига таъсир қилади.

Танаффус жорий йил 21 январдан бошланади.

Reuters кўрган расмий хабарномага кўра, департамент АҚШ визасига ариза топшираётган барча шахслар учун «энг юқори даражадаги текширув ва саралаш»ни таъминлаш мақсадида барча сиёсатлар, қоидалар ва кўрсатмаларни «тўлиқ қайта кўриб чиқиш» жараёнидан ўтказмоқда.

Виза танаффуси таъсир қиладиган давлатлар рўйхати (Reuters манбаси келтирган рўйхат):

Афғонистон, Албания, Жазоир, Антигуа ва Барбуда, Арманистон, Озарбайжон, Багама ороллари, Бангладеш, Барбадос, Беларусь, Белиз, Бутан, Босния, Бразилия, Камбоджа, Камерун, Кабо-Верде, Колумбия, Конго Демократик Республикаси, Куба, Доминика, Миср, Эритрея, Эфиопия, Фижи, Гамбия, Грузия, Гана, Гренада, Гватемала, Гвинея, Гаити, Эрон, Ироқ, Кот-дЪИвуар (Фил суяги соҳили), Ямайка, Иордания, Қозоғистон, Косово, Қувайт, Қирғизистон, Лаос, Ливан, Либерия, Ливия, Шимолий Македония, Молдова, Мўғулистон, Черногория, Марокаш, Мянма, Непал, Никарагуа, Нигерия, Покистон, Конго Республикаси, Россия, Руанда, Cент-Китс ва Невис, Cент-Люсия, Cент-Винсент ва Гренадинлар, Сенегал, Серра-Леоне, Сомали, Жанубий Судан, Судан, Сурия, Танзания, Таиланд, Того, Тунис, Уганда, Уругвай, Ўзбекистон ва Яман.

АҚШ элчихоналари ва консулликларига юборилган хабарда – «ушбу мамлакатлар фуқаролари АҚШда давлат ижтимоий ёрдамларидан фойдаланишга интилганлик аломатлари мавжуд»лиги айтилган.

«Ушбу мамлакатлардан бўлган аризачилар АҚШда давлат учун молиявий юк бўлиш хавфи юқори бўлган шахслар ҳисобланади ва маҳаллий, штат ҳамда федерал ҳукумат ресурсларига мурожаат қилиш эҳтимоли мавжуд», — дейилади расмий хабарномада.

Бу қарор АҚШга ташриф буюриш (visitor) визаларига таъсир қилмайди. Чунки бу турдаги визалар 2026 йилги Жаҳон чемпионати ва 2028 йилги Олимпия ўйинларига АҚШ мезбонлик қилиши сабаб эътибор марказида турибди.

Қарор ноябрь ойида АҚШ дипломатларига юборилган кўрсатмадан кейин қабул қилинди. Ўшанда улардан виза аризачиларининг молиявий жиҳатдан ўзини таъминлай олишини ва АҚШда бўлиш вақтида давлат субсидияларига қарам бўлиб қолмаслигини текшириш сўралган эди.

«Давлат департаменти узоқ йиллик ваколатидан фойдаланиб, АҚШ учун 'public charge' бўлиши ва Америка халқининг саховатидан суиистеъмол қилиши мумкин бўлган потенциал муҳожирларни номувофиқ деб топади. Ушбу 75 мамлакатдан иммиграцион визаларни кўриб чиқиш Давлат департаменти иммиграция жараёнларини қайта баҳолагунча тўхтатилади — бу давлат нафақаси ва ижтимоий ёрдамларни олиш учун келадиган хорижликларнинг кириб келишининг олдини олишга қаратилган», — деган Давлат департаменти матбуот хизмати расмийси Томми Пиготт.

Хабарномада АҚШ консуллик ходимларига – «print authorized» (чоп этишга рухсат берилган), аммо ҳали чоп этилмаган визаларни ҳам, чоп этилган, аммо консуллик бўлимидан чиқиб кетмаган визаларни ҳам рад этиш бўйича кўрсатма берилган.

Доналд Трамп январь ойида лавозимга қайтгач, иммиграцияга қарши кенг кўламли чораларни бошлади. Унинг маъмурияти иммиграцияни мажбурий назорат қилишни кескин кучайтирди, АҚШнинг йирик шаҳарларига федерал агентларни юборди: улар мигрантлар ҳамда АҚШ фуқаролари билан зўравон тўқнашувларга сабаб бўлмоқда.

Аслида Трамп ноқонуний иммиграцияни тўхтатишни ваъда қилиб сайлов кампаниясини олиб борган бўлсада, унинг маъмурияти қонуний иммиграцияни ҳам қийинлаштирди. Масалан, юқори малакали мутахассислар учун мўлжалланган H-1B визалари аризачиларига янги ва қиммат тўловларни жорий қилди.

«Бу ҳаракат келаси бир йил ичида қарийб 315 минг нафар қонуний муҳожирни рад этади ва АҚШга келаётган қонуний муҳожирларнинг деярли ярмига тақиқ қўяди», — деган Иммиграция тадқиқотлари директори ва Селз фонди иммиграция сиёсати бўйича раиси Девид Бир.

АҚШ давлат департаментига кўра, Трамп лавозимга келганидан бери 100 мингдан ортиқ виза бекор қилинган. Маъмурият шунингдек визаларни беришда янада қатъий сиёсат жорий қилган — жумладан, ижтимоий тармоқларни текшириш кучайтирилган ва қўшимча скрининг киритилган.

Республикачи Трамп, ноябрь ойида Оқ уй яқинида афғонистонлик шахс томонидан амалга оширилган отишмадан сўнг барча «Учинчи дунё мамлакатлари»дан миграцияни «доимий тўхтатиш»га ваъда берган эди.