АҚШ ва Эрон ўртасида яна зарбалар алмашинуви бўлиб ўтди

Америка армияси «Эронинг давом этаётган тажовузи»га жавобан Эрон ҳудудидаги бир қанча нишонларга зарбалар йўллади, деб хабар қилди АҚШ қуролли кучлари марказий қўмондонлиги (CENTCOM).

Ҳарбий кузатув иншоотлари, алоқа тизимлари, ҳаво ҳужумидан мудофаа кучлари позициялари, дронлар сақланадиган омборлар ҳамда денгизни миналашда фойдаланиладиган қурилмалар зарбалар учун нишон бўлган. Марказий қўмондонлик олдинги зарбалар алмашинувидан кейин Эронга «ўт очишни тўхтатиш шартларига риоя қилиш имконияти берилгани»ни маълум қилди. Аммо Эрон кучлари зарбдор дрон қўллаган ҳолда Ҳўрмуз бўғози яқинидан ўтаётган ва Панама байроғи остида ҳаракатланган танкерга зарба берган.

U.S. Navy and Air Force fighter jets conducted strikes tonight on 10 Iranian military targets at multiple locations in and near the Strait of Hormuz for Iran's drone attack on M/T Kiku. pic.twitter.com/Z0TLZRqmF6

— U.S. Central Command (@CENTCOM) June 28, 2026

Доналд Трамп Эрон навбатдаги марта ўт очишни тўхтатиш бўйича келишувни бузганини таъкидлади. «Улар ҳеч қачон сабоқ чиқармайдиганга ўхшайди! Шундай пайт келиши мумкинки, биз энди оқилона бўлиб қола олмаймиз ва муваффақиятли бошланган ишни ҳарбий йўл билан охирига етказиб қўйишга мажбур бўламиз. Бу ҳолда Эрон ислом республикаси ўз мавжудлигини йўқотади», – дея ёзган Трамп.

Ислом инқилоби муҳофизлари корпуси эса эронлик ҳарбийлар «Америка тажовузига жавобан» АҚШ армиясининг саккизта объектига – Кувайтдаги Али ас-Салом авиабазаси ҳамда Баҳрайндаги Салмон портида жойлашган АҚШ ҳарбий-денгиз кучлари Бешинчи флоти базасига баллистик ракеталар ва дронлар билан зарба йўллаганини маълум қилган. Қайд этилишича, АҚШ корпус кучларининг қоидабузар кемага нисбатан қўллаган чорасини баҳона қилиб, Эроннинг соҳилдаги бешта постига ҳужум уюштирган.

Ҳўрмуз орқали ўтишни Эрон назорат қилмоқда ва бундан кейин қоидабузар кемаларга нисбатан «янада қатъийроқ чоралар» қўлланади, дея қўшимча қилинган корпус баёнотида.

18 июн куни АҚШ ва Эрон ўртасида ўзаро англашув меморандуми имзоланганди. Бу ҳужжат 60 кун давомида бутун фронт бўйлаб ҳарбий ҳаракатларни тўхтатиш ва урушни бутунлай тўхтатиш бўйича музокараларни бошлашни, шунингдек, Ҳўрмуз бўғози очилишини назарда тутади. Ўтган вақт мобайнида бўғоз ҳудудидаги кемалар ҳужумга учраши билан боғлиқ бир неча ҳолатлар кузатилди, бундай ҳолатларда Америка кучлари Эрондаги нишонларга ҳужум қилиб келмоқда.