Трамп Тинчлик кенгашига Путинни таклиф қилди

Владимир Путин Ғазони бошқарадиган Тинчлик кенгашига аъзо бўлиш таклифини олди, деди Кремл матбуот котиби Дмитрий Песков.

«Ҳа, ҳақиқатан ҳам, президент Путин ҳам дипломатик каналлар орқали Тинчлик кенгаши таркибига кириш таклифини олди. Айни пайтда биз таклифнинг барча тафсилотларини ўрганмоқдамиз, жумладан, барча нозик жиҳатларни аниқлаштириш учун Америка томони билан алоқа ўрнатишга умид қиламиз», деди Песков.

Тинчлик кенгаши ўт очишни тўхтатгандан кейин Ғазо секторини бошқариш учун халқаро ташкилот сифатида таклиф этилмоқда. Оқ уй унга АҚШ давлат котиби Марко Рубио, Яқин Шарқ бўйича махсус вакил Стив Уиткофф, АҚШ президентининг куёви Жаред Кушнер ва Буюк Британиянинг собиқ бош вазири Тони Блэр киришини аллақачон эълон қилган. Бироқ, Bloomberg танишиб чиққан низомга кўра, Тинчлик кенгаши анча кенгроқ функцияларга эга бўлиши керак. Ҳужжатда у «барқарорликка кўмаклашиш, ишончли ва қонуний бошқарувни тиклаш ҳамда можаролар таъсир кўрсатган ёки таҳдид остида бўлган ҳудудларда мустаҳкам тинчликни таъминлашга интилаётган халқаро ташкилот» деб таърифланган. Унинг раиси Трамп бўлади ва унга умрбод аъзо бўлиш учун мамлакатлар камида 1 миллиард доллар тўлаши керак.

Вашингтон Тинчлик кенгашида иштирок этиш учун 50 мамлакат, хусусан Аргентина, Канада, Франция, Германия, Австралия, Баҳрайн, Миср, Туркия, Беларус, Қозоғистон, Исроил ва Ўзбекистон етакчиларига таклифнома юборган.

Аввалроқ, Трамп Ўзбекистонни Тинчлик кенгашига таклиф этгани, Шавкат Мирзиёев ташкилотга таъсисчи давлат сифатида қўшилишга тайёрлигини билдиргани ҳақида хабар берилган эди.