WP: Пентагон Миннесотага десантчиларни юборишга тайёргарлик кўряпти

The Washington Post (WP) газетасининг АҚШ Мудофаа вазирлиги мансабдорларига таяниб ёзишича, АҚШ армиясининг тахминан 1500 нафар ҳарбий хизматчисига Миннесота штатига кўчишга тайёр туриш ҳақида буйруқ берилган. У ерда миграция полицияси ҳаракатларига қарши акциялар тинмаяпти. Бу ҳақда WP якшанба, 18 январ куни Пентагондаги исми ошкор этилмаган расмийларга таяниб хабар берди.

Фото: REUTERS

Манбаларга кўра, 11-ҳаво-десант дивизиясининг икки пиёда баталони жалб қилиниши мумкин. Улар Аляскада жойлашган ва совуқ шароитга ўрганган. Айни пайтда Миннесотанинг шимолида кундузи тахминан -15°C, кечаси эса -20°Cдан паст.

WP билан суҳбатлашган Пентагон вакили қўшинларни тайёрлашни “оқилона режалаштириш” деб атаган ва якуний қарор ҳали қабул қилинмаганини айтган. Нашр таъкидлашича, ҳарбийларни митингларни бостириш учун юбориш 1992 йилдан бери биринчи бундай ҳолат бўлиши мумкин. Ўшанда ҳарбийлар Лос-Анжелесдаги тартибсизликларни бостирган.

15 январ куни Дональд Трамп TruthSocial ижтимоий тармоғида очиқчасига 1807 йилги “Исён тўғрисидаги қонун” (Insurrection Act)ни қўллаши мумкинлигини ёзган. Ушбу қонун армияни мамлакат ичида ишлатишга рухсат беради. Миннесотада норозиликка чиққанларни республикачи Трамп “исёнчилар” деб атаган.

Миннесота аҳолиси 7 январ куни Миннеаполисда ўтказилган рейд пайтида иммиграция полицияси (ICE) агенти АҚШ фуқароси Рене Никол Гудни отиб ўлдирганидан кейин ҳар куни норозилик акцияларига чиқмоқда. Шаҳар ва штат ҳокимияти иммиграция полициясининг ҳаракатларига қарши чиққан. Миннеаполис мэри, демократ Жейкоб Фрей ICE агентларидан “шаҳардан чиқиб кетиш”ни талаб қилиб, уларнинг ҳаракатлари аҳоли хавфсизлигига таҳдид солаётганини айтган.

Шу орада, АҚШ Адлия вазирлиги Фрей ва Миннесота штати губернатори, демократ Тим Уолзга нисбатан тергов бошлаган. Улар иммиграция полицияси фаолиятига тўсқинлик қилиш мақсадида тил бириктирганликда гумон қилиняпти.

Уолз эса суд-ҳуқуқ тизимини сиёсий рақибларга қарши қўллаш авторитар амалиёт эканини айтган. Унинг сўзларига кўра, Рене Гуднинг ўлими бўйича тергов доирасида ягона тергов қилинмаётган шахс — унга қарши қурол ишлатган федерал агентнинг ўзи.