Андижонда қарийб 19 минг долларни нонлар орасига яшириб олиб чиқиб кетмоқчи бўлган фуқаро ушланди

Андижон вилояти божхона бошқармаси ходимлари томонидан “Дўстлик” чегара божхона пости орқали 18 800 АҚШ доллари олиб чиқиб кетилишининг олди олинди.

Божхона назоратидан ўтиш учун қизил йўлакни танлаган фуқаро ўзининг ёнида белгиланган меъёр доирасида валюта борлигини маълум қилиб, божхона декларациясини тўлдирган. Декларация расмийлаштирилганидан сўнг божхона ходими фуқаронинг қўл сумкаларини назоратдан ўтказган.

Оғзаки сўровда қариндошлари учун олинган нон ва қанд-қурс солинганлиги айтилган сумкадаги нонлар орасида 18 800 АҚШ доллари борлиги аниқланди.

Ушбу ҳолат бўйича дастлабки суриштирув ҳаракатлари олиб борилмоқда.

Қонунга кўра, жисмоний шахслар 100 млн сўмгача бўлган нақд валютани белгиланган тартибда чекловсиз олиб чиқиши мумкин.