Самарқандда 16 қаватли бино сунъий зилзила орқали синовдан ўтказилди

Самарқанд вилояти Қурилиш ва уй-жой коммунал хўжалиги соҳасида ҳудудий назорат қилиш инспекцияси ҳамда қатор ҳамкор ташкилотлар иштирокида Тойлоқ тумани Чароғбон маҳалласи “Янги Ўзбекистон” массиви ҳудудида барпо этилаётган 16 қаватли кўп қаватли турар жой биносида зилзилабардошлик синови ўтказилди.

Синов жараёнида махсус вибродинамик ускуна ёрдамида бино конструкцияларига 8 балли зилзилага мос тебраниш берилди. Таъкидланишича, мазкур усул иншоотнинг сейсмик барқарорлигини реал шароитга яқин ҳолатда баҳолаш имконини берди.

Қайд этилишича, ўтказилган синов натижалари асосида келгусида биноларнинг сейсмик мустаҳкамлигини янада кучайтириш бўйича тегишли чора-тадбирлар белгилаш режалаштирилган.