Қўшимча функционаллар
-
Тунги кўриниш
Россия Трампнинг «Тинчлик кенгаши» биринчи йиғилишида иштирок этмайди
«Тинчлик кенгаши»нинг биринчи йиғилиши 19 февраль куни Вашингтонда бўлиб ўтиши айтилмоқда.
Фото: AP
Россия 19 февраль куни Вашингтонда бўлиб ўтадиган Трампнинг «Тинчлик кенгаши» биринчи йиғилишига ўз вакилларини юбормайди. Бу ҳақда Россия президенти вакили Дмитрий Песков маълум қилди.
«Кремлдан ҳеч ким боришни режалаштирмаяпти. «Кенгаш» мавзуси ҳали ҳам Ташқи ишлар вазирлигида кўриб чиқилмоқда», деди у.
«Тинчлик кенгаши»нинг биринчи йиғилиши 19 февраль куни Вашингтонда бўлиб ўтади, деб хабар берди The New York Times (NYT) ва Axios манбалари. NYT манбасининг сўзларига кўра, бўлажак саммитнинг асосий мавзуларидан бири Ғазо секторини реконструкция қилиш учун маблағ йиғиш бўлади.
Беларус президенти Александр Лукашенко ҳам «Тинчлик кенгаши» йиғилишида иштирок этишдан бош тортди, чунки Беларус раҳбарига биринчи учрашувга таклифнома жуда кеч келган.
Аввалроқ, Россия президенти Владимир Путин «Тинчлик кенгаши»га аъзо бўлиш таклифини олгандан сўнг, АҚШ ҳудудида музлатилган маблағлардан Ғазони тиклашни молиялаштириш учун 1 миллиард доллар йўналтиришга тайёрлигини маълум қилган эди.
«Биз «Тинчлик кенгаши»га АҚШ собиқ маъмурияти даврида музлатилган Россия активларидан 1 миллиард доллар йўналтиришимиз мумкин», деди у.
Bloomberg нашри АҚШ ҳукумати Ғазо сектори бўйича халқаро «Тинчлик кенгаши»дан доимий ўрин олишни истаган давлатлардан камида 1 миллиард доллар ажратишни сўраётгани ҳақида хабар берган эди.
Александр Лукашенконинг аниқлик киритишича, дастлабки уч йил давомида «Тинчлик кенгаши»да таъсисчи сифатида бепул иштирок этиш мумкин.
