Россия Трампнинг таҳдидларига қарамай, Кубага нефть етказиб беришга қарор қилди

Россия ёқилғи инқирозига учраган Кубага нефть ва нефть маҳсулотларини жўнатишга тайёрланмоқда, деб хабар берди Россиянинг Гаванадаги элчихонасига таяниб «Известия». Дипломатларнинг аниқлик киритишича, таъминот «яқин келажакда гуманитар ёрдам сифатида» режалаштирилган, ҳажмлар ошкор этилмаган.

Баёнот АҚШ президенти Доналд Трампнинг Кубани ёқилғи билан таъминлашга уринган давлатларга қарши қўшимча божлар жорий этиш билан таҳдид қилиши фонида янгради.

Куба бир ойдан бери чет элдан нефть олмаяпти, ўз захиралари эса деярли тугади. Январь ойи охирида Kpler компанияси ёқилғи импортисиз 20 кундан ортиқ ишлай олмаслигини ҳисоблаб чиқди. Нефтнинг сўнгги партияси 9 январь куни Трампнинг таҳдидларидан кейин экспортни музлатиб қўйган Мексикадан келтирилди. Орол учун иккинчи асосий хомашё етказиб берувчи бўлган Венесуэла 3 январь куни АҚШ махсус кучлари президент Николас Мадурони қўлга олганидан кейин таъминотни тўхтатди.

Нашр маълумотларига кўра, Россия нефтининг Кубага сўнгги йирик етказиб берилиши ўтган йилнинг февраль ойида амалга оширилган. 100 минг тонна хомашё (733 минг баррель) президент Владимир Путин томонидан ажратилган 60 миллион долларлик давлат кредити шаклида йўналтирилган.

Кремлда Трампнинг Кубага қарши чораларини «бўғувчи усуллар», оролдаги ёқилғи билан боғлиқ вазиятни эса «танқидий» деб аташди. Россия президенти матбуот котиби Дмитрий Песковнинг айтишича, Москва Гаванага «кучли ёрдам» кўрсатиш имкониятини кўриб чиқмоқда.