Кўплаб давлатлар учун олтин эндиликда шунчаки ҳимоявий актив эмас — у геосиёсий кескинлик кучайиши, валюталар барқарор эмаслиги ва резервларни диверсификация қилиш (айниқса АҚШ долларига боғлиқликни камайтириш) шароитида стратегик захирага айланди.
Бироқ барча мамлакатлар бир хил стратегияни тутмади: айримлари олтин захираларини фаол оширган бўлса, бошқалари аксинча — уларни қисқартирди.
Жаҳон олтин кенгаши (World Gold Council) маълумотларига асосланган инфографика сўнгги беш йил ичида олтин захиралари бўйича энг катта соф ўсиш ва энг катта соф камайиш кўрсатган давлатларни рейтинг шаклида тақдим этади.
Жами ҳисобда, 15 та энг йирик харидор мамлакат бу даврда расмий олтин захираларини қарийб 2000 тоннага оширган. Бу давлат резервларини бошқариш стратегиялари кенг кўламда қайта кўриб чиқилаётганидан далолат беради.
Хитой энг катта ўсишни кўрсатди: у 350 тоннадан ортиқ олтин олди. Бу қадам Пекиннинг резервларни диверсификация қилиш, АҚШ долларига боғлиқликни камайтириш ва ғарб молиявий тизими олдидаги заифликни пасайтиришга қаратилган узоқ муддатли стратегиясига мос келади. Шу билан бирга, олтин халқаро резервлар таркибида сиёсий жиҳатдан нейтрал актив сифатидаги ўрнини мустаҳкамламоқда.
Полша иккинчи ўринни эгаллаб, олтин захираларини 300 тоннадан ортиққа кўпайтирди — бу молиявий барқарорликни кучайтиришга қаратилган узоқ муддатли сиёсатнинг бир қисми ҳисобланади.
Энг йирик харидорлар қаторида Туркия ва Ҳиндистон ҳам бор. Иккала мамлакатда ҳам инфляция босими барқарор юқори ва миллий валюталар ўзгарувчан бўлгани учун, олтин расмий резервлар таркибида ҳедж қилиш воситаси сифатида жозибадор бўлиб қолмоқда.
Етакчилардан ташқари, бир қатор ривожланаётган мамлакатларда ҳам захираларни сезиларли тўлдириш қайд этилди. Бразилия 100 тоннадан ортиқ олтин сотиб олди, Озарбойжон эса Давлат нефт жамғармаси орқали ўз резервларини оширди.
Япония, Таиланд, Венгрия, Сингапур ва Россия ҳам олтин захираларини кенгайтирди — бу иқтисодий ноаниқлик даврларида олтинга барқарорлаштирувчи актив сифатида бўлган глобал қизиқишнинг кенгайганини акс эттиради.
Кўплаб марказий банклар захираларни оширган бир пайтда, айрим давлатлар аксинча — олтин захираларини камайтирди. Бу резерв сиёсатида устувор йўналишлар турлича эканини кўрсатади.
