АҚШ Олий суди Трамп томонидан киритилган импорт божларини бекор қилди

АҚШ Олий суди президент Доналд Трамп томонидан жорий этилган импорт божларининг катта қисмини ноқонуний деб топди. Бу ҳақда суд қарори материалларига таяниб AP хабар берди.

Суд Трамп маъмурияти Конгресснинг бевосита розилигисиз кенг кўламли тарифларни жорий этиш учун 1977 йилда қабул қилинган Халқаро фавқулодда иқтисодий ваколатлар тўғрисидаги қонундан (IEEPA) фойдаланиб, ваколат доирасидан четга чиққан деб топди.

Аксарият судьяларнинг фикрига кўра, ушбу қонун президентга ҳокимиятнинг қонун чиқарувчи тармоғини четлаб ўтиб, кенг савдо божларини жорий этиш ҳуқуқини бермайди.

Қандай божлар бекор қилинди?

Гап ўнлаб мамлакатлардан импортга нисбатан қўлланилган «глобал» ва «жавоб» тарифлари ҳақида бормоқда. Бу чоралар савдо тақчиллигини камайтириш ва АҚШ ташқи ҳамкорларига босим ўтказишга қаратилган қатъий савдо сиёсатининг бир қисми эди.

Молиявий оқибатлар

Таҳлилчиларнинг ҳисоб-китобларига кўра, илгари йиғилган 175 миллиард доллардан ортиқ тариф тушумлари энди хавф остида қолган. Суд қарори импортчилар томонидан маблағларни қайтариш тўғрисидаги талабларга йўл очиши мумкин.

Нима учун бу муҳим?

Суд амалда президентнинг якка ўзи кенг кўламли савдо чекловларини жорий этиш имкониятини чеклаб қўйди.

Қарор импорт товарлари нархига ва АҚШ умумий савдо сиёсатига таъсир қилиши мумкин.

Шунингдек, Трамп маъмурияти Конгресс орқали янги қонунчилик ташаббуслари ёки савдо механизмларини қайта кўриб чиқишга уриниши мумкин.

Экспертларнинг таъкидлашича, энди Оқ уй ва Трамп тарафдорлари божларнинг бир қисмини бошқа ҳуқуқий меъёрлар асосида тиклаш учун муқобил ҳуқуқий йўлларни излаши мумкин.