Германияда автодилер ФСБ учун машиналар етказиб бергани учун 6 йилга қамалди

Россияга санкцияларни бузган ҳолда люкс тоифадаги 111 та автомобил етказиб бергани учун Вюрцбург шаҳридаги суд Бавариядан бўлган автодилерни 6 йилга қамашга ҳукм қилди, деб хабар берди Эссен шаҳри божхона бошқармаси 2 март, душанба куни. Машиналарнинг охирги қабул қилувчилари орасида ФСБ, ФСО ходимлари, “Роснефть” ҳамда РФ президенти маъмурияти вакиллари бўлган.

49 ёшли автодилер Андреас М. Россияга товар етказиб бериш бўйича эмбаргони бузганликда айбдор деб топилди, деб аниқлик киритди тергов билан шуғулланган Эссен божхона бошқармаси. Эркакнинг шериги Инна В. эса 2 йил муддатга шартли жазо олди. Шунингдек, суд айбдорлардан 18,6 млн евро ундириш ҳақида қарор чиқарди. Ҳукмдан олдин айбни тан олиш бўйича келишув тузилган, ҳозирча ҳукм қонуний кучга кирмаган.

Тергов 2024 йил май ойидан бошлаб Эссен божхона бошқармаси ва Вюрцбург прокуратураси томонидан биргаликда олиб борилган. Қайд этилишича, автодилер “бронланган автомобиллар, аввало Германиянинг машҳур ишлаб чиқарувчиларидан бирининг машиналарини” сотишга ихтисослашган. Терговчилар бу қайси компания эканини аниқ айтмаган. Улар эълон қилган мусодара қилинган машина суратида эса Mercedes-Benz S-класс кўрсатилган.

Андреас М. бу машиналарни қалбаки фирмалар тармоғи орқали сотиб олган. 2022 йилда Россияга люкс автомобиллар сотишга чекловлар киритилганидан кейин, ушбу дилер Москвадаги энг йирик икки премиум автосалоннинг асосий етказиб берувчиларидан бирига айланган. Урушгача у асосан Қозоғистон билан савдо қилган.

Жами у Россияга қарийб 20 млн евро қийматидаги 111 та автомобилни етказиб берган. Яна 40 млн евро қийматидаги 400 та авто сотилиши олди олинган.