Ўзбекистон аэропортларидан Яқин Шарқ мамлакатларига парвозлар вақтинча тўхтатилди

Ўзбекистондан Саудия Арабистони, Бирлашган Араб Амирликлари, Қатар, Эрон, Кувайт ва Исроил аэропортларига парвозлар тўхтатилди.

Фото: Kun.uz

Яқин Шарқдаги жорий вазият муносабати билан барча резидент ва норезидент авиакомпаниялар Ўзбекистон аэропортларидан Саудия Арабистони, Бирлашган Араб Амирликлари, Қатар, Эрон, Кувайт ва Исроил аэропортларига амалга ошириладиган парвозларни вақтинча тўхтатиб туради. Бу ҳақда Uzbekistan Airports хабар берди. Чеклов қачонгача амал қилишига аниқлик киритилмаган.

Таъкидланишича, ҳозирги вақтда резидент ва норезидент авиакомпаниялар томонидан 2026 йил 28 февралгача жўнаб кетган йўловчиларни Ўзбекистонга қайтариш мақсадида парвозлар амалга оширилмоқда. Ушбу рейслар бўйича маълумотларни аниқлаштириш учун фақат авиакомпанияларнинг ваколатхоналарига мурожаат қилиш лозим.

28 феврал куни АҚШ ва Исроил томонидан Эрон ҳудудига ҳаво зарбалари бошланиши ортидан ушбу мамлакат ҳаво ҳудуди ёпилган эди.

1 март куни Ўзбекистон мусулмонлари идораси ҳамда туроператорлар томонидан ташкил этилаётган умра сафарлари вақтинча кечиктирилди.

Минтақада юзага келган вазият ҳануз кескинлигича қолмоқда.

Тайёрлаган Сардор Юсупов

#Саудия Арабистони #Эрон #БАА

Эрон ядро дастури бўйича музокаралар расман тугамай туриб, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди.