АҚШ Россия нефтига нисбатан санкцияларни бекор қилмайди

Американинг Россия нефтига қарши санкциялари бекор қилинмайди. Бу ҳақда АҚШ энергетика вазири Крис Райт CNN эфирида маълум қилди.

Шунингдек, у Эрон расмийсининг АҚШ ҳарбий операцияси фонида жаҳон нефт нархи яқин келажакда бир баррел учун 200 долларга етиши мумкинлиги ҳақидаги даъвосига шубҳа билдирди.

«Мен буни эҳтимолдан йироқ деб айтган бўлардим, аммо биз ҳарбий операция ва муаммони ҳал қилишга эътибор қаратмоқдамиз», деди Райт.

Вашингтоннинг Россияга нисбатан санкциялар сиёсати ўзгармаяпти, нефт бозоридаги нархларни жиловлаш бўйича қадамлар эса аллақачон қўйилмоқда, деб таъкидлаганди 9 март куни Райт. У АҚШнинг Ҳиндистонга Россия нефтини сотиб олиш учун лицензия бериш тўғрисидаги қарорига шундай изоҳ берди.

Шу куни Reuters манбаларга таяниб, АҚШ Россия нефтига нисбатан санкцияларни янада юмшатиш имкониятини кўриб чиқаётганини маълум қилди. Бу қарор Яқин Шарқдаги можаро фонида нефт нархини барқарорлаштиришга интилиш билан изоҳланган. Кейинроқ Руминия ва Бангладеш ҳам Вашингтондан Россия нефти билан ишлашга рухсат беришни сўради. Дакка Ҳиндистон лицензиясига ўхшаш ҳужжат сўрамоқда.

АҚШ ва Исроилнинг Эронга қарши операцияси ва Эроннинг Ҳўрмуз бўғози орқали ёқилғи ташувчи кемалар транзитини амалда тўсиб қўйиши фонида жаҳон бозорида нефт нархи кескин ошди. Бир неча кун олдин бир баррел учун деярли 120 долларгача кўтарилиш содир бўлди, кейин Brent нархи тушди, аммо 12 март куни эрталаб худди шу ҳажм учун яна 100 доллардан ошди.

Вазиятнинг кескинлашуви фонида жаҳон давлатлари мавжуд нефт захираларини бўшатишни муҳокама қила бошлади, баъзилари, масалан, Венгрия ёқилғи экспортига тақиқ ва чекланган нархларни жорий қилди.