АҚШ Россияга босимни кучайтириш учун янги санкциялар пакетини тайёрлади

Axios нашрининг хабар беришича, қонун лойиҳаси демократлар ва республикачилардан иборат икки партияли сенаторлар гуруҳи томонидан ишлаб чиқилган. Ҳужжатни тайёрлаш жараёнида сенатор Линдси Грэм ҳам фаол иштирок этган.

Лойиҳага мувофиқ, Россия нефти ва газининг энг йирик беш импортчисига 100 фоизлик импорт божлари жорий этилади. Нашр қайд этишича, ушбу чоралар энг аввало Хитой ва Ҳиндистонга таъсир қилиши мумкин.

АҚШ президенти Доналд Трамп мазкур ташаббус юзасидан фикр билдириб, уни жиддий кўриб чиқаётганини айтди.

«Биз бу масалани кўриб чиқяпмиз. Бу Линдси хотираси учун. У айнан шуни энг кўп истаган эди», — деди Трамп.

Қонун лойиҳасининг ҳаммуаллифларидан бири сенатор Ричард Блументал Линдси Грэм вафотидан олдин Киевдан қўнғироқ қилиб, Трамп ташаббусни қўллаб-қувватлашини айтганини эслади. Унинг таъкидлашича, ҳужжатнинг асосий мақсади Россиянинг ҳарбий ҳаракатларини молиялаштириш имкониятларини чеклаш ва Москвани тинчлик музокараларига ундашдан иборат.

Маълум қилинишича, 2025 йил ёзида Сенат Россияга қарши санкцияларни қабул қилиш арафасида бўлган. Бироқ ўша вақтда Доналд Трамп Украинадаги урушни тугатиш бўйича дипломатик ҳаракатларга тўсқинлик қилмаслик мақсадида республикачи сенаторларни овоз беришни кечиктиришга чақирган эди.

Янги таҳрирдаги қонун лойиҳаси аввалги вариантга нисбатан юмшатилган. Илк таклифда Россия нефти ва газини харид қилувчи давлатлар учун 500 фоизлик бож кўзда тутилган бўлса, ҳозирги ҳужжатда бу ставка 100 фоиз этиб белгиланган.

Шу билан бирга, қонун лойиҳаси президентга айрим ҳолатларда истисно қўллаш ваколатини беради. Аммо бундай қарорлар Конгресс томонидан тасдиқланиши лозим бўлади.

Сенатор Жинн Шейхиннинг таъкидлашича, ҳужжат қабул қилинса, Россияга қарши янги қаттиқ иқтисодий чекловлар жорий этилади ва унинг ҳарбий ҳаракатларини молиялаштиришда муҳим ўрин тутаётган энергия экспорт бозорлари сезиларли даражада қисқаради.

Линдси Грэм 11 июл куни 71 ёшида кутилмаган касаллик оқибатида вафот этган. У вафотидан бир кун аввал Киевга ташриф буюриб, Украина президенти Володимир Зеленский билан учрашган ҳамда Россия ва унинг иттифоқчиларига қарши санкцияларни кучайтириш масалаларини муҳокама қилган.

Доналд Трамп марҳум сенаторни «чинакам америкалик ватанпарвар» деб атаб, уни АҚШ тарихидаги энг фаол ва нуфузли сенаторлардан бири сифатида эътироф этди.

Линдси Грэм Жанубий Каролина штати вакили сифатида 1994 йилда Вакиллар палатасига, 2002 йилда эса АҚШ Сенатига сайланган. У ташқи сиёсат ва мудофаа масалаларида қатъий позицияси, Россияни танқид қилиши ва Украинани қўллаб-қувватлаши билан танилган сиёсатчилардан бири эди.