Хитой мия имплантини тижорий мақсадларда ишлатишни маъқуллаган биринчи давлат бўлди

Хитойнинг дори воситаларини назорат қилиш бошқармаси Neuracle Technology компаниясига мижозларга мия имплантини сотиш учун тарихда биринчи рухсатномани берди. У орқа мия шикастланиши оқибатида қисман фалаж бўлган одамлар учун мўлжалланган.

BCI-имплант - бу нейрон сигналларини тўғридан-тўғри ўқиш ва рағбатлантириш учун жарроҳлик йўли билан мияга ёки унинг ёнига жойлаштирилган «мия-компьютер» интерфейси. У миянинг электр фаоллигини ташқи компьютерлар учун буйруқларга айлантиради. Бу беморларга протезларни фикр кучи билан бошқариш имконини беради. Хитойлик ишлаб чиқувчининг таъкидлашича, Neuracle стартапининг қурилмаси беморларга жисмларни қўллари билан ушлашга ёрдам берган. У 36 беморда синовдан ўтказилди.

Хитойда маъқулланган имплантат миянинг қаттиқ қобиғидан ташқарида ўрнатилиши ва сигналларни ўқиш учун камроқ каналларга эгалиги билан илғор тизимлардан фарқ қилади. Шу сабабли қурилма фақат қисман фалаж бўлган беморларга мос келади.

Хитой ҳукумати аввалроқ BCI имплантларини ишлаб чиқиш ва тарғиб қилишни олтита стратегик соҳа рўйхатига киритган эди. Хитой ҳукумати текширувларни соддалаштиришга ва маҳсулотлар бозорга чиқишидан олдин харажатларни қоплаш қоидаларини ўрнатишга ваъда берди. Бунинг фонида бир қатор технологик компанияларнинг акциялари сезиларли даражада ошди, деб таъкидлайди Bloomberg. Бу соҳага инвестициялар нафақат Хитойда, балки АҚШда ҳам ортиб бормоқда. Бироқ, Америка компаниялари, жумладан, миллиардер Илон Маск томонидан асос солинган Neuralink ҳозирча фақат одамларда клиник синовлар ўтказиш учун рухсат олди.