Пентагон Украинага ҳарбий ёрдамни мувофиқлаштирган генералга қарши тергов юзасидан ҳисобот берди

Маълум бўлишича, у бир сафар Киевда қаттиқ маст бўлиб қолиб, жароҳатланган, шунингдек, махфий хариталарни поездда унутиб қолдирган.

Украина президенти матбуот хизмати / Planet Pix / ZUMA Press Wire

АҚШ мудофаа вазирлиги 2024 йилда Украинага ҳарбий ёрдамни мувофиқлаштиришга масъул бўлган истеъфодаги генерал-майор Антонио Агутога нисбатан тергов бўйича ҳисоботни эълон қилди. Терговга генералнинг ҳамкасблари томонидан аноним тарзда айтиб берилган икки воқеа сабаб бўлган.

Бу воқеалардан биринчиси 2024 йил апрелида рўй берган. Ўшанда Агуто поездда Украинадан Германиянинг Висбаден шаҳрига борган ва махфий хариталар солинган идишни купеда қолдириб кетган. Ҳужжатларни бир кун давомида қидиришган, кейин эса уни украиналик борт кузатувчиси топиб олиб, Америка элчихонасига олиб борган.

Якунда махфий хариталар тарқалиб кетмаган, аммо генерал бу воқеа учун жавобгарликни ўз зиммасига олган.

Иккинчи ҳодиса эса Агутонинг 2024 йил майида Киевга қилган хизмат сафари билан боғлиқ, ўшанда у маст бўлиб қолиб, мияси чайқалган. Пентагон бош инспектори идораси аниқлашича, 13 май куни генерал грузин ресторанидаги зиёфатга борган. Маросим олти соат давом этган. Бу вақт мобайнида ҳарбий ўз суҳбатдоши (ҳисоботда унинг шахси яширилган) икки шиша чачи ичимлигини бўшатган.

Агуто меҳмонхонага қайтганидан кейин номерда йиқилган ва боши билан деворга урилган. Тун давомида у яна йиқилиб тушган ва пешонаси билан ерга тушган.

14 май куни соат 9:00 да генерални машинада АҚШнинг Киевдаги элчихонасига олиб кетишган. Ҳисоботда айтилишича, у машинадан чиқишда ҳам йиқилиб, тирсаги ва жағи билан бетон тротуарга урилган, натижада курткаси ва кўйлаги йиртилган.

Ўн дақиқа ўтиб генерал ўша вақтдаги давлат котиби Энтони Блинкен билан учрашувда ҳозир бўлган. Бир ярим соатдан кейин эса ўз қўл остидагилар билан видеоконференцияда қатнашган. Гувоҳларнинг сўзларига кўра, икки тадбирда ҳам Агутонинг мастлиги кўриниб турарди.

Уч соатдан кейин генерал Украина ҳарбий раҳбарияти билан учрашувда қатнашади. Украина қуролли кучлари ҳарбийлари ҳам унинг ўзини тутишидан мастлигини гумон қилишади.

Соат 15:00 лар атрофида Америка элчихонаси шифокори Агутога мия чайқалиши ташхисини қўяди ва уни маҳаллий госпиталга юборади. У ерда ташхис тасдиқланади. Кейинги куни Агуто Украинани тарк этади.

Якунда Пентагон инспектори офиси генерални ҳарбий хизматчига бир кун давомида икки рюмкадан ортиқ ўткир спиртли ичимлик ичишни тақиқловчи низомни бузганликда айбдор деб топади.

2024 йил августида Агуто Украина хавфсизлигига кўмаклашиш гуруҳи (SAG-U) раҳбари лавозимини тарк этади.