Олий тоифали педагог Зулайҳо Ҳабибуллаева математик билимларни оммалаштиришга қаратилган “ZuLine – Bilim yoʻlida birga yuramiz” лойиҳаси асосчиси. У ижтимоий тармоқларда “Matem master” номи билан ижод қилади. Ўз фаолияти давомида ёшларга билим бериб, уларнинг математик тафаккурини ривожлантиришга ҳисса қўшиб келмоқда. Унинг дарслари содда тушунтириш усули, қизиқарли машқлар ва ҳаётий мисоллар билан ажралиб туради.
Зулайҳо Ҳабибуллаева Андижон Муҳандислик иқтисодиёт институтининг иқтисодиёт факултетида таҳсил олган. Математика фанига қайта ўқиб, умумтаълим мактабларида ўқитувчи бўлиб ишлади. Ижтимоий тармоқлардаги чиқишлари қисқа фурсат ичида оммалашган лойиҳа асосчиси математика фанини қандай қилиб ҳаётга уйғунлаштираётгани ҳақида сўзлаб берди:
“Битта видеоролигимиздан кейин инсонлар онгида шунақанги портлаш бўлдики, математика шунчалик қизиқ, шунчалик осон фан эканини кўпчилик англаб етди. Бундан жудаям хурсанд бўлдим ва фаолиятимни давом эттириш учун ана шу видео остидаги изоҳлар туртки бўлди.
Ўзи аслида болалигимдан математика фанига жуда қизиқар эдим. Математикага урғу бериб, уни қандай қилиб инсон қалбига олиб кириш мумкинлиги ҳақида ўйлаб айнан инсонларнинг ҳаётдаги оғриқли нуқталаридан бошладим. Яъни тангенс, котангенс инсонга қачон керак бўлади, нега керак? Демак биз математикани ҳаётга уйғунлаштиришимиз керак. Инсонлар математиканинг кераклигини ҳис қилиши учун уни ҳаётга боғлашим керак деб ўйладим.
Кимдир мусиқа чалишга, кимдир расм чизишга қизиқади. Мана шу қизиққан соҳаларига математикани боғлаган ҳолда ўргатишни хоҳладим. Мактабни битириб ўз ўрнини эгаллаб олган, ёшлари анчага борган инсонларни математикага қандай қизиқтирсам бўлади деган фикр келди-да, машина шинаси ҳақида видео тайёрладик. Машинанинг шинаси қандай ҳолатда бўлса сизга фойдали? Айлана узунлиги ва доира юзи деган мавзумиз бор математикада.
Стандарт бўйича шиширилган шина бир марта айланганда қанча узунликни босиб ўтади? Тўлиқ шиширилганда 185 сантиметр юрса, бир сантиметргагина радиус фарқ қилганда 182 юради, яъни 3 сантиметр, бир айланганда 3 сантиметр кам юради ва бир километрда қанча кам юришини ҳисоблаб бердим. Машина шинасида демак диска айланади. Диска айланганда демак бир километрга 9 та кўп айланар экан ҳалиги кичкина радиусли машинамиз.
Масалан, кундалик ҳаётда математика кераклигини тушунтириш учун яна бир изланиш қилдим яқинда. Яъни буни медицинага ҳам боғласа бўлар экан деган фикр келди-да. Синусни билмаганингиз бўйин остеохондрозига ёки грижасига олиб келиши мумкин. Қандай?
