Хитойлик аёл 28 йил олдин қайнотаси ҳожатхонага ташлаб кетган фарзандини топди

Хитойлик кекса эркак янги туғилган қиз набирасини ҳожатхонага ташлаб юборди, чунки у ўғилни хоҳлаган эди. Қиз тирик қолди ва 28 йилдан сўнг ўз оиласини топди, деб ёзди South China Morning Post.

Хун Янли қишлоқда туғилди ва оиладаги учинчи қиз фарзанд эди. Унинг онаси Ян Сяоин сўзларига кўра, туғруқнинг эртаси куни қайнотаси чақалоқни олиб кетишни ва унга ўзи ғамхўрлик қилишни таклиф этган. Аёл рози бўлган, чунки у туғруқдан кейин тикланаётган, эри эса сафарда эди.

Бобо «ўғил болаларни афзал кўрарди», шунинг учун набирасини қўшни қишлоқдаги ҳожатхонага ташлаб кетди. Боланинг йиғисини йўловчи эшитиб қолди, унинг ёнидан 120 юан (тахминан 18 доллар), бир пакет қуруқ сут ва туғилган куни ёзилган хат топилди.

Бобо набирасини қаерда қолдирганини оиласига айтишдан бош тортди. Қизнинг онаси шундан сўнг «уни бир умрга ёмон кўриб қолганини ва ҳатто ўлимига қадар умуман гаплашмаганини» айтди. Унинг эри Сюй Лихун сўзларига кўра, у йиллар давомида ўзини айбдор ҳис қилган, аммо «катталарга ҳурмати туфайли» полицияга мурожаат қилмаган ва отаси билан жанжаллашмаган.

Қизча болалар уйига топширилди ва бир йил ўтгач, уни Нидерландиядан келган жуфтлик асраб олди ва Европага олиб кетди. У ерда Хун Янли меҳр ва ғамхўрликда ўсди, таълим олди ва ҳатто докторлик диссертациясини ҳимоя қилди. Қиз ўзининг биологик оиласини хитойлик кўнгиллилар ёрдамида топди, улар унга ДНК намунасини йўқолган болаларнинг маълумотлар базасига топширишга ёрдам беришди.

Хун Янли 14 март куни туғилган қишлоғидаги оиласи билан учрашди, кўнгиллилар унга бутун йўл давомида ҳамроҳлик қилиб, таржимонликда ёрдам беришди. Ота-онаси қизни зиёфат ва мушакбозлик билан кутиб олди. Отаси эса унга олтин билагузук ва нефрит тақинчоқ совға қилди. Энди улар ёзда Нидерландияга саёҳат қилиб, қизини асраб олган ота-онасига миннатдорчилик билдирмоқчи.

Анъанавий Хитой маданиятида ўғил - авлод давомчиси, ота-онанинг қариган чоғидаги таянчи ҳисобланади, қизлар бошқа оилага «кетади». Аммо бу ҳолат бобонинг хатти-ҳаракатларини зинҳор оқламайди, лекин мотивациясини тушунтиради.

Бундай ҳолат ягона эмас. Хитойнинг 1980-1990-йиллардаги туғилишни қисқартиришга қаратилган «бир оилага – бир фарзанд» сиёсати туфайли минглаб қизлар «ташлаб юборилган», бошқа оилага ёки фарзандликка олиши учун чет элликларга берилган. Уларнинг кўпчилиги бугунги кунда ҳам ўз илдизларини изламоқда.