Автогигантлар электромобилларга ўтиш режаларини оммавий равишда ўзгартиряпти – FT

Honda, Bentley, Lotus, Audi, Porsche, Mercedes-Benz, Ford, Stellantis, Volvo Cars, Rolls-Royce, Lamborghini вa Ferrari электромобиллар ишлаб чиқариш стратегияларини қайта кўриб чиқди, дея хабар берди Financial Times.

Нашрнинг қайд этишича, бундай қарор қабул қилинишига ички ёнув двигателли автомобилларга бўлган талаб ҳануз юқори экани ҳамда АҚШ ва Европада давлат қўллаб-қувватлаш чораларининг бекор қилиниши таъсир кўрсатган.

Стратегияларнинг ўзгариши, янги моделлар чиқаришнинг бекор қилиниши ва молиявий режаларнинг қайта кўриб чиқилиши натижасида автомобил саноати сўнгги бир йил ичида камида 75 миллиард доллар йўқотган.

Honda 2040 йилгача ички ёнув двигателли автомобиллар ишлаб чиқаришни тўхтатиш режасидан воз кечди. Компания стратегия ўзгариши сабаб яқин икки йил ичида 16 миллиард долларгача зарар кўриши мумкин.

Умуман олганда, Mercedes-Benz, Ford, Stellantis, Volvo Cars, Bentley, Lotus, Audi вa Porsche яқин ўн йилликда тўлиқ электромобилларга ўтиш режаларини ўзгартирди.

Rolls-Royce (BMW таркибига киради) 2023 йилда илк ҳашаматли электромобили Spectre’ни тақдим этганига қарамай, 2030 йилдан кейин ҳам бензинли автомобиллар ишлаб чиқаришни давом эттиришини маълум қилди.

Ferrari 2030 йилгача бўлган электромобиллар ишлаб чиқариш режаларини икки баравар қисқартирди. Бироқ компания ҳар қандай двигател туридан қатъи назар, “ҳайдаш завқи”ни бир хил даражада таъминлаш ниятида эканини билдирган.

Financial Times бу тенденцияни АҚШдаги солиқ имтиёзлари шартларининг ўзгариши ва Европа Иттифоқида транспорт чиқиндилари бўйича талабларнинг юмшатилиши билан изоҳлади. Таъкидланишича, Доналд Трамп ҳокимиятга қайтгач, Оқ уй электромобиллар хариди учун федерал солиқ имтиёзларини бекор қилган ҳамда зарядлаш инфратузилмасига ажратиладиган маблағларни қисқартирди.