Пентагон Яқин Шарққа 2 минг нафар десантчи жўнатди

Пентагон АҚШ ҳаво-десант дивизиясининг 2 мингга яқин аскарини Яқин Шарққа юборишни бошлашга буйруқ берди. Бу ҳақда The New York Times газетаси АҚШ ҳарбий вазирлигидаги икки манбага таяниб хабар берди.

Йўналтирилган гуруҳ «Тезкор ҳаракат кучлари» (IRF) - 18 соат ичида дунёнинг исталган нуқтасида жойлаштирилиши мумкин бўлган 3 мингга яқин ҳарбий хизматчидан иборат бригададан ташкил топган, деб хабар берди NYT суҳбатдошлари. Уларнинг сўзларига кўра, контингент таркибида ҳар бири 800 га яқин аскардан иборат иккита батальон ҳам бор. Яқин кунларда Яқин Шарққа IRF қўшимча аскарлари ҳам юборилиши мумкин, дея қўшимча қилди Пентагон вакиллари.

Минтақага аллақачон юборилаётган 4,5 мингга яқин денгиз пиёдаларини ҳисобга олган ҳолда, 2 минг нафар десантчининг жойлаштирилиши ҳарбий можаро бошланганидан бери жанговар ҳаракатлар зонасига юборилган қўшимча қуруқликдаги қўшинларнинг умумий сонини деярли 7 минг кишига оширади ва янги кескинлашувни англатади, деб таъкидлайди NYT. «Эпик ғазаб» ҳарбий операциясига Яқин Шарқ, АҚШ ва Европадан жами 50 мингга яқин ҳарбий хизматчи жалб қилинган.

Газета суҳбатдошларининг сўзларига кўра, АҚШ десантчилардан Форс кўрфази шимолидаги Эрон нефтининг асосий экспорт маркази - Эрондаги Харқ оролини эгаллаш учун фойдаланиши мумкин, деб ёзди нашр.

Шу ҳафта охирида Яқин Шарққа 2,3 мингга яқин АҚШ денгиз пиёдаси етиб келиши кутилмоқда: Пентагон улардан Харқни қўлга олиш ёки Ҳўрмуз бўғозини очишда ёрдам бериш учун ҳам фойдаланиши мумкин. Аммо, расмийларга кўра, Яқин Шарққа зирҳли машиналар каби оғир техникалар юборилмайди.