Тарихий миссия: астронавтлар рекорд масофага учиб боришди, Ойни айланиб ўтишди ва нариги томондан сурат олишди

«Артемида II» миссияси ўз дастуридаги асосий бандни муваффақиятли бажарди ва Ой атрофида парвоз қилди. Ернинг табиий йўлдошини айланиб ўтиш учун «Орион» кемасига етти соат керак бўлди. Кема Ойнинг орқа томонида эканида у билан алоқа узилганди ва астронавтлар шу вақт оралиғида олинган суратларни кейинроқ кўрсатишни ваъда қилишган. «Медуза» миссиянинг бу босқичи қандай ўтгани ҳақида қисқача ҳикоя қилди.

7 апрелга ўтар кечаси бортида АҚШдан уч астронавт Рид Уайсмен, Виктор Гловер, Кристина Кох ҳамда канадалик Жереми Ҳансен бўлган «Орион» кемаси режа бўйича Ойга 6 минг километр масофада яқинлашди ва Ер табиий йўлдошининг атрофида айланиб учди. Кема Ойнинг орқа томонига ўтганида тахминан 40 дақиқа давомида у билан алоқа бўлмаган.

 CNN қайд этишича, бу кема экипажининг Ердан алоқаси узилиши билан боғлиқ бўлган энг узоқ муддат бўлди. «Артемида II» миссияси Ердан 252 756 мил (406 771 километр) масофага узоқлашган ҳолда яна бир рекордни ўрнатди. Бундан олдинги рекорд – 248 655 мил – «Аполлон 13»га тегишли эди ва 1970 йилдан буён сақланиб қолаётганди.

Ой атрофини айланиб учаётганида астронавтлар унинг юзасига урилган метеороидларнинг камида олти бор чақнашига гувоҳ бўлишган, шунингдек кема турган нуқтадан туриб қуёшнинг тўлиқ тутилишини кузатишган ҳамда қуёш тожини тасвирга олишган.

«Орион» билан алоқа режа бўйича тикланган. BBC’нинг ёзишича, дастлаб радиосигнал қайтган, кейин эса маълумотларнинг катта пакети келган, шундан кейин Кристина Кохнинг тиниқ овози эшитилган: «Ҳюстон, „Интегрити“, алоқа текшируви. Ерни яна эшитиш жуда ажойиб».

Шундан кейин кўп ўтмай АҚШ президенти Доналд Трамп астронавтларга қўнғироқ қилган. «Бугун сиз тарихга кирдингиз ва бутун Американи чинакамига фахрланишга ва мағрурланишга мажбур қилдингиз, – деган у. – Сўнгги пайтларда бизда фахрланиш учун сабаблар кўп бўлмоқда, аммо ярим асрдан кўпроқ вақт ичида илк бор Ойга етиб бориб, уни айланиб чиқиб, Ердан узоқ кетиш бўйича мутлақ рекорд ўрнатганингиз каби бошқа иш бўлгани йўқ». Трамп «Орион» экипажи аъзоларини Ерга қайтгандан кейин Оқ уйга келишга таклиф қилган. АҚШ президентининг сўзларига кўра, у астронавтлардан автографлар олмоқчи.

Миссиянинг муҳим босқичини амалга оширгач, астронавтлар Ерга қайтишни бошлади. Бунинг учун тўрт кунга яқин вақт кетади. Кема Вашингтон вақти билан 10 апрел куни (Осиёда 11 апрелга ўтар кечаси) Тинч океанига етиб келиши кўзда тутилган.