Британия Ҳўрмуз блокадасида қатнашишдан бош тортди – ОАВ

Аввалроқ АҚШ президенти Доналд Трамп Америка ва Эрон делегацияларининг Покистонда бўлиб ўтган музокараларидан сўнг Ҳўрмуз бўғози блокада қилинишини эълон қилганди.

Фото: Reuters

Буюк Британия АҚШнинг Ҳўрмуз бўғозини блокада қилиш операциясида қатнашиш таклифини рад этди, деб хабар берди Sky News телеканали ўз манбасига таяниб.

Аввалроқ АҚШ президенти Доналд Трамп Британия денгиз йўлини миналардан тозалаш учун ўз кемаларини жўнатишини айтганди.

«Биз кемалар қатнови эркинлигини ҳамда жаҳон иқтисодиётини қўллаб-қувватлаш ва мамлакатда яшаш харажатларини пасайтириш учун зарур бўлган Ҳўрмуз бўғози очилишини қўллаб-қувватлашда давом этамиз»,— деди Sky News суҳбатдоши.

Унинг қўшимча қилишича, Буюк Британия Франция ва бошқа ҳамкорлар билан «кемалар қатнови эркинлигини ҳимоя қилиш учун кенг коалиция» тузиш устида ишламоқда.

Доналд Трамп Америка ва Эрон делегацияларининг Покистонда бўлиб ўтган музокараларидан сўнг Ҳўрмуз бўғози блокада қилинишини эълон қилганди.

У АҚШ ҳарбий-денгиз кучлари «Ҳўрмуз бўғозига киришга ёки ундан чиқишга уринадиган барча кемаларнинг йўлини ҳеч қандай истисноларсиз тўсиб чиқиши», блокада яқин вақтлар ичида бошланиши ва унга бошқа мамлакатлар ҳам қўшилишини қайд этган.

Тайёрлаган Дилшодбек Асқаров

#Буюк Британия #Ҳўрмуз бўғози

Эрон ядро дастури бўйича музокаралар расман тугамай туриб, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди.