Трамп: Эрон билан можаро тугашига оз қолди

АҚШ президенти Дональд Трамп ўз мамлакати Исроил билан бирга Эронга қарши олиб бораётган уруш “ниҳоясига яқин” деб ҳисоблайди. Бу ҳақда у Fox News журналисти Мария Бартиромога берган интервьюсида айтган баёнотларидан маълум бўлди. Ушбу суҳбатдан парча 15 апрель, чоршанба куни эфирга узатилиши керак бўлган дастур олдидан телеканал сайтида эълон қилинди.

Эрон билан уруш тугадими, деган саволга жавоб берар экан, Трамп шундай деди: “Менимча, у… Мен аралашишимга тўғри келди, чунки агар мен буни қилмаганимда, ҳозир сиз ядровий қуролга эга Эронни кўриб турган бўлардингиз. Агар уларда ядровий қурол бўлганида, сиз у ердагиларнинг ҳар бирига ‘жаноб’ деб мурожаат қилишингизга тўғри келарди, сиз эса буни истамайсиз”.

Уруш тугадими, деган саволга аниқлик киритилиб қайта мурожаат қилинганда, президент шундай жавоб берди: “Менимча, у тугашига яқин, ҳа. Назаримда, у ниҳоясига жуда яқин”.

Трампнинг сўзларига кўра, агар АҚШ ҳозирнинг ўзида ўз қўшинларини олиб чиқиб кетса, Эроннинг тикланишига 20 йил керак бўлади.

“Биз ҳали тугатганимиз йўқ. Нима бўлишини кўрамиз”, — деб қўшимча қилди у ва унинг фикрича, Эрон келишув тузишга “жуда жиддий” ёндашаётганини таъкидлади.

AP агентлиги эслатишича, Эрондаги уруш бошланганидан кейин Дональд Трамп вазият анча мураккаб бўлган пайтларда ҳам АҚШ ғалаба қозонганини бир неча бор эълон қилган.

Ўз навбатида, АҚШ вице-президенти Жей Ди Вэнс 14 апрель куни Жоржияда бўлиб ўтган Turning Point номли тадбирда сўзга чиқиб, Трампнинг Эрон борасидаги мақсади “катта келишув” тузиш эканини билдирди.

Вэнснинг айтишича, Трамп Эронга, агар Ислом Республикаси ядровий қурол яратмаслик мажбуриятини ўз зиммасига олса, фаровонликни ваъда қилган.

“Биз уни (Эронни) иқтисодий жиҳатдан гуллаб-яшнаган мамлакатга айлантирамиз ва Эрон халқини жаҳон иқтисодиётига менинг бутун умрим давомида кузатмаган даражада жалб этамиз”, — дея АҚШ вице-президентидан иқтибос келтиради AP агентлиги.

Аввалроқ, икки ҳафталик ўт очишни тўхтатиш тартиби давом этаётган бир пайтда, Дональд Трамп Эрон билан музокаралар давом этиши мумкинлигига ишора қилди.

“Яқин икки кун ичида Исломободда нимадир содир бўлиши мумкин”, — деди у The New York Post газетасига телефон орқали берган интервьюсида, бироқ тафсилотларга тўхталмади.

Эрондаги уруш бўйича икки ҳафталик сулҳ 22 апрель куни якунланади. 12 апрель куни Покистон пойтахтида тугаган АҚШ ва Эрон ўртасидаги музокараларнинг биринчи раунди сезиларли натижа бермади.

АҚШ маълум қилишича, Эрон ядровий қуролдан воз кечиши бўйича қатъий кафолат бермаган. Ўз навбатида, Теҳрон Вашингтонни “қабул қилиб бўлмайдиган талаблар”ни қўйишда айблади.

АҚШ ва Исроил 28 февраль куни Эронга қарши ҳарбий операция бошлади — Трамп бу қарорни Теҳроннинг ядровий қурол яратишининг олдини олиш зарурати билан изоҳлаган эди. Беш ҳафта давом этган жанговар ҳаракатлардан сўнг томонлар икки ҳафталик сулҳга келишиб олди.