Сиёсатчи Дунцова Россияда эркин интернет учун «уйда норозилик» уюштиришни таклиф қилди

Журналист ва сиёсатчи Екатерина Дунцова Россияда эркин интернет учун «уйда норозилик»ни ташкил этиш ниятини эълон қилди.

Дунцова ўзининг телеграм каналида ёзишича, расмийлар сўнгги пайтларда кўча норозилигининг деярли ҳар қандай шаклини тақиқламоқда, шунинг учун у одамларни кўчага чиқармасдан норозилигини билдирмоқчи.

«Бутун ҳафта давомида соат 8 да деразаларни очиб, эркин интернет учун шовқин-сурон кўтариш - ҳуштак чалиш, кастрюлькаларни тақиллатиш, мусиқани ёқиш, ҳар қандай хавфсиз усулда ва рухсат этилган шовқин даражаси доирасида», деб ёзди сиёсатчи.

Дунцованинг таъкидлашича, бундай норозилик расман тақиқланмаган, аммо «барчамиз бугунги кунда қонун қанчалик мослашувчан талқин қилинаётганини тушунамиз».

Шу муносабат билан у Россия президенти Владимир Путин, Давлат думаси спикери Вячеслав Володин, Федерация кенгаши раҳбари Валентина Матвиенко, Тергов қўмитаси раиси Александр Бастрикин, ички ишлар вазири Владимир Колоколцев ва бош прокурор Александр Гуцанга мурожаат йўллади. У барча хоҳловчиларни шундай савол билан ҳокимият вакилларига мурожаат қилишга чақирди.

Екатерина Дунцова - журналист ва Ржев шаҳри думасининг собиқ депутати. 2024 йилда у Россия президенти сайловида иштирок этишни режалаштирган эди, бироқ Марказий сайлов комиссияси уни рўйхатдан ўтказишни рад этди. Шундан сўнг, у ўзининг «Тонг» сиёсий партиясини тузишга ҳаракат қилди, бироқ Россия Адлия вазирлиги уни рўйхатдан ўтказишдан бош тортди.

2024 йил май ойида (президентлик сайловидан икки ой ўтгач) Россия ҳукумати Дунцовани «чет эл агенти» деб эълон қилди.