Зеленский Россияга зарба бериш масофаси узайганини маълум қилди

Президент сўзларига кўра, Украина «тўғри чизиқ бўйлаб 1500 километрдан ортиқ масофадаги» Россия объектларига зарба бермоқда.

Туапседаги нефтни қайта ишлаш заводи Фото: Anastasiia Troianova/Kedr

Украина «ҳарбий салоҳиятини чеклаш» мақсадида Россия ҳудудига зарба бериш масофасини оширди. Бу ҳақда Украина президенти Володимир Зеленский Украина Хавфсизлик хизмати раҳбари вазифасини вақтинча бажарувчи генерал-майор Евгений Хмаранинг маърузасидан сўнг маълум қилди.

Унинг сўзларига кўра, Украина «тўғри чизиқ бўйлаб 1500 километрдан ортиқ масофада» Россия объектларига зарба бермоқда.

Президентнинг айтишича, ҳар бир бундай ҳужум «Россия ҳарбий саноати, логистика ва нефть экспорти имкониятларини пасайтиради».

«Дипломатияга ўтиш вақти келди ва бу сигнални Москва эшитиши керак», деб хулоса қилди Украина раҳбари.