Украина яна Туапсега зарба берди

Туапсе. Украина 1 майга ўтар кечаси Краснодар ўлкасининг Туапсе шаҳрига навбатдаги марта зарба йўллади. Регион оператив штабига кўра, денгиз терминали ҳудудида ёнғин чиққан. Оловни ўчириш учун 100 дан ортиқ киши ва 40 дан ортиқ техника жалб этилган. Расмийлар ҳеч ким яраланмагани ҳақида маълум қилган.

Украинадаги Exelinova+ мониторинг паблиги хабар қилишича, терминал ҳудудида нефт маҳсулотлари сақланаётган бир неча резервуар ёниб кетган. Гувоҳлар томонидан олинган кадрларда Туапсе осмонида қуюқ қора тутун кўтарилганини кўриш мумкин.

Краснодар ўлкаси губернатори Вениамин Кондратев Украинанинг Туапсе бўйлаб янги зарбаси юзасидан муносабат билдирмади. Унинг телеграм-каналида 1 май байрами муносабати билан табрик эълон қилинган, губернатор ўлка аҳолисига уларнинг хонадонида «доимо тинчлик, эзгулик ва фаровонлик ҳукм суриши»ни тилаган.

Украина сўнгги ҳафталарда мунтазам равишда Туапсени ўққа тутмоқда. 16 апрелдан буён украин дронлари Туапседаги денгиз терминали ва ушбу терминал билан битта комплекс таркибида бўлган маҳаллий нефтни қайта ишлаш заводига бир неча бор ҳужум қилганди. Шаҳарда кенг кўламли ёнғинлар чиққан, ҳар бир ҳолатда оловни ўчириш учун бир неча кундан вақт сарфланган. Нефтни қайта ишлаш заводидаги охирги ёнғин 30 апрел куни, навбатдаги зарба йўлланиши арафасида ўчирилганди.

Нефт объектларида чиққан ёнғинлар туфайли Туапседаги экологик вазият кескин ёмонлашган: шаҳарга бир неча бор «нефт ёмғири» тушган, дарё ва денгизда нефт маҳсулотлари қолдиқлари аниқланган (уларни йиғиштириб олиш ишлари давом этмоқда). Нефтни қайта ишлаш заводидаги сўнгги ёнғин вақтида кўчаларга қайнаб турган нефт сизиб чиққан.

Перм. Ўт ўчирувчилар Перм шаҳри ва унинг ташқарисида 29 ва 30 апрел кунлари «Транснефт» ва «Лукойл» компаниялари объектларига йўлланган зарбалар оқибатида чиққан ёнғинларни ўчиришда давом этмоқда.

Маҳаллий «Пермь 36,6» телеграм-каналида эълон қилинган фото ва видеоларда шаҳар осмонини қора тутун қамраб олгани акс этган. Журналистларга кўра, шаҳар йўналишини ўзгартирган ва энди тутун Перм ўлкасининг жанубий районлари томон йўналган. «Перм аҳолиси бироз енгил тортди: ҳид ёки йўқолди, ёки камайди», – дея ёзади канал муаллифлари. Шу билан бирга, Пермда «нефт ёмғири» ёғиши давом этмоқда.

Пермдаги экологик фалокат кўлами ва оқибатлари бўйича Туапседагидан кам эмас, дейишган экологлар «Агентство» нашрига. Улардан бири анонимлик шарти билан тутун ва «нефт чўкиндилари» таркибида «энг зарарли моддалар – полиароматик углеводородлар», шу жумладан, биринчи даражали хавфли канцероген – бензол мавжудлигини айтган.

Бошқа бир экспертнинг айтишича, Перм ўлкасидаги ёнғинлар «ҳатто Туапседаги ёнғинлардан ҳам кучлироқ, демак, хавфлироқ бўлиши мумкин». «Бу худди Туапседаги каби ёнғин, менимча, у ердаги заҳарли ва канцероген моддалар ҳавода бир хил», – деган «Экозашита!» экологик гуруҳи вакили Владимир Сливяк «Агентство» нашрига.

Перм ўлкаси губернатори Дмитрий Махонин 1 май куни саноат майдонидаги ёнғинни ўчириш жойига боргани ҳақида ёзган (бу нефтни қайта ишлаш заводими ёки нефт ҳайдаш станциясими, аниқ эмас). Фавқулодда вазиятлар вазирлигининг ҳудудий бошқармаси бошлиғи Александр Урусов ёнғин қуршаб олинганини маълум қилган.

Губернатор Роспотребнадзор ҳаво сифатини доимий равишда назорат қилишда давом этаётганини таъкидлаган: «Пробалар мунтазам равишда олинмоқда, ифлослантирувчи моддалар бўйича ортиқча кўрсаткичлар қайд этилмаган. Аҳоли учун ҳеч қандай хавф йўқ».

Украина Кремлни уруш олиб бориш учун ишлатиладиган даромад манбайидан маҳрум қилиш мақсадида Россиядаги нефт объектларига кетма-кет зарбалар бермоқда. Bloomberg хабарига кўра, апрел ойида Украина 2025 йил декабридан кейинги даврда Россиянинг нефт объектларига максимал миқдорда ҳужум уюштирган. Агентлик ҳисоблашич, Украина бир ой ичида Россиянинг нефтни қайта ишлаш заводлари, денгиздаги объектлар ҳамда нефт маҳсулотлари ташиладиган қувурлар бўйлаб камида 21 марта зарба йўллаган.

Bloomberg ёзишича, апрел ойида Россиянинг тўққизта нефтни қайта ишлаш заводи фаолиятини тўхтатган. OilX таҳлил компанияси маълумотига кўра, Россия нефтни қайта ишлаш заводларининг ўртача унумдорлиги кунига 4,69 миллион баррелгача пасайди, бу 2009 йил декабридан бери энг паст кўрсаткичдир.