Трамп Ҳўрмуз бўғозида қолиб кетган кемаларни «озод этиш» операциясини эълон қилди

Оқ уй раҳбарининг таъкидлашича, «бутун дунё мамлакатлари» Вашингтонга АҚШ ва Эрон ўртасидаги можаро туфайли Ҳўрмуз бўғозида тўхтаб қолган кемаларини озод қилишни сўраб мурожаат қилган.

Фото: AP

АҚШ 4 май куни эрталаб Яқин Шарқ вақти билан Ҳўрмуз бўғозида қолиб кетган кемаларни «озод қилиш» операциясини бошлайди. Бу ҳақда АҚШ президенти Доналд Трамп Truth Social ижтимоий тармоғида маълум қилди.

Унинг сўзларига кўра, «бутун дунё мамлакатлари» Вашингтонга АҚШ ва Эрон ўртасидаги можаро туфайли Ҳўрмуз бўғозида тўхтаб қолган кемаларини озод қилишни сўраб мурожаат қилган.

«Биз Эрон, Яқин Шарқ ва АҚШ манфаати учун бу мамлакатларга уларнинг кемаларини ушбу чекланган сув йўлларидан хавфсиз ўтказамиз, шунда улар ўз ишини эркин ва тўлақонли давом эттиришлари мумкин... бу жараён, Project Freedom («Озодлик лойиҳаси») душанба куни эрталаб Яқин Шарқ вақти билан бошланади», деди Америка раҳбари.

Шу билан бирга, Трамп агар операцияга кимдир тўсқинлик қилишга уринса, АҚШ куч билан жавоб беришини айтди.

«Агар бу гуманитар жараёнга қандайдир тарзда тўсқинлик қилинса, бундай аралашувни, афсуски, куч билан ҳал этишга тўғри келади», деб ёзди Трамп.

АҚШ Қуролли кучлари марказий қўмондонлиги (CENTCOM) маълумотларига кўра, кемаларнинг Ҳўрмуз бўғозидан ўтишини таъминлаш бўйича «Озодлик» операциясига эсминецлар, самолётлар ва 15 минг ҳарбий хизматчи жалб қилинади.

Операцияга Давлат департаменти ва АҚШ Қуролли Кучлари марказий қўмондонлиги кемачилик эркинлиги денгиз коалицияси доирасида раҳбарлик қилади.