Остонада Путин кортежига ҳарбий машина ҳамроҳлик қилмоқда

РФ президенти Владимир Путиннинг Қозоғистонга уч кунлик ташрифи хавфсизлик чоралари қаттиқ кучайтирилган шароитда ўтмоқда.

Маҳаллий аҳоли вакиллари ва журналистлар томонидан олинган видеороликларда Путиннинг кортежига 14 та мотоцикл, ўнлаб автомобиллар ҳамроҳлик қилгани, юқоридан эса кортежни вертолёт қўриқлаб борганини кўриш мумкин.

«Агентство» нашри эътибор қаратишича, кортеж таркибидаги айрим автомобилларга дронларга қарши курашишда фойдаланиладиган радиоэлектрон кураш воситалари ўрнатилган, шунингдек, кортеждан том қисмида пулемётчи учун жой бўлган зирҳли машина ҳам ўрин олган.

Астанада олинган кадрларда Путин ўтаётган йўллар бўйлаб автомат кўтарган ҳарбийлар жойлаштирилгани, баъзи жойларда кириш йўллари зирҳли техникалар билан тўсиб қўйилгани ҳам кўринади.

Май ойида CNN ва Financial Times Европа мамлакатларидан бирининг разведка хизматига таяниб, Федерал қўриқлаш хизмати (ФСО) Путинга суиқасд уюштирилишидан хавотирда экани, шу туфайли хавфсизлик чоралари кескин кучайтирилгани ҳақида хабар берганди. Хусусан, Путин ташриф буюрадиган жойлар рўйхати жиддий даражада қисқартирилган – у ҳатто Москва яқинидаги ва Валдайдаги ўз қароргоҳларига боришни ҳам тўхтатган. У энди кўп вақтини бункерларда ўтказмоқда. «Агентство» РФ президенти 2025 йил ноябридан буён регионларга чиқмагани ва оммавий тадбирларда деярли кўриниш бермаётганига эътибор қаратган.