Украина навбатда: Зеленский урушни тўхтатиш бўйича музокаралар ҳақида гапирди

Президент урушни тезроқ тугатиш учун Путин билан учрашишга тайёрлигини таъкидлади.

Фото: Украина президенти офиси

Украина АҚШ музокаралар гуруҳининг келишини кутмоқда, аммо бу жуда чўзилиб кетяпти. Бу ҳақда президент Володимир Зеленский НАТО бош котиби Марк Рютте билан учрашувда маълум қилди.

«Афсуски, бугун биз диққат марказида эмасмиз. Менимча, Эрон Америка Қўшма Штатлари учун биринчи рақамли масаладир. Сўнгра Украинага навбат келади», деди Зеленский.

Унинг таъкидлашича, айнан АҚШ Путинни урушни тугатишга энг кучли туртки бера оладиган давлатдир. Шу билан бирга, Зеленскийнинг таъкидлашича, Украина учун музокараларга Вашингтон ҳам, Европа ҳам жалб қилиниши энг яхши вариант бўлар эди.

«Уруш бу ерда, Европа қитъасида. Мен ҳақиқатан ҳам энг кучли вариант АҚШ ва Европа вакиллари деб ҳисоблайман. Аммо, айтганимдек, биз учун барибир биринчи ўринда урушни тугатиш туради. Бу ерда муқобил йўл йўқ. Шунинг учун мен очиқ айтдим: биз ҳар қандай форматни қўллаб-қувватлаймиз. Ва мен бу урушни тугатиш учун Путин билан бевосита музокараларга тайёрман. Дунёдаги барча можаролар тугатилгунча навбатда туришни истамайман», деб қўшимча қилди Зеленский.