Перес «Реал»га Жозе Моуриньо бош мураббий бўлишини эълон қилди

Мадриднинг «Реал» клуби президенти сайловида ғолиб чиққан Флорентино Перес жамоага Жозе Моуриньо бош мураббий этиб тайинланишини эълон қилди.
Испания клубининг 2030 йилгача бўлган президенти лавозимига қайта сайланган Перес португалиялик мутахассиснинг Мадрид жамоасига қайтганидан мамнунлигини билдирди.
Сайлов натижалари эълон қилингач, 79 ёшли Перес шундай деди: «Мен бу ерга «Реал»ни ҳимоя қилиш учун келдим. Биз «Реал»нинг чемпионликни қўлга киритишда давом этиши учун ишлаймиз. Биз дунёдаги энг яхши стадион - «Сантяго Бернабеу» билан фахрланамиз. Биз дунёдаги энг яхши футболчиларимиз борлигидан ва дунёдаги энг яхши мураббийлардан бири, ҳақиқий мадридлик Жозе Моуриньо қайтиб келаётганидан фахрланамиз. Шубҳаланманг: мен президент бўлганимда, «Реал» ўз аъзоларининг клуби бўлган ва шундай бўлиб қолади», деди у.
Клуб баёнотида айтилишича, Перес умумий йиғилишда 21741 (65 фоиз) овоз олиб, президент этиб сайланган. Унинг рақиби Энрике Рикелме 11814 та овоз (35 фоиз) тўплади.
Моуриньо 2010 йилдан 2013 йилгача «Реал»да ишлаган. Унинг қўл остида жамоа Испания чемпионати, кубоги ва Суперкубогини қўлга киритди. Ўтган мавсум якунларига кўра, мадридликлар бирорта ҳам совринни қўлга киритолмади.