Аббосбек Файзуллаев жаҳон чемпионати 1-турининг энг тезкор футболчиси бўлди

Файзуллаев шунингдек, XXI асрдаги жаҳон чемпионатларида боши билан гол урган энг паст бўйли футболчи сифатида қайд этилиб, уругвайлик Жоржиан де Арраскаэтага тегишли рекордни янгилади.

Фото: Ўзбекистон футбол ассоциацияси

Ўзбекистон миллий жамоаси яримҳимоячиси Аббосбек Файзуллаев 2026 йилги жаҳон чемпионатининг биринчи туридаги энг тезкор футболчи деб топилди.

SofaScore платформаси маълумотларига кўра, 22 ёшли футболчи Колумбияга қарши ўйин давомида соатига 36 километр тезликка эришган. Бу натижа биринчи турда майдонга тушган барча ўйинчилар орасида энг юқори кўрсаткич бўлди.

Файзуллаевдан кейинги ўринни хорватиялик Йосип Станишич эгаллаган бўлиб, унинг максимал тезлиги соатига 35,9 километрни ташкил этган. Кот д’Ивуар вакили Вилфрид Синго эса 35,8 км/соат натижа билан учинчи ўринни эгаллаган.

Аббосбек Файзуллаев Ўзбекистон миллий жамоасининг мундиалдаги илк голи муаллифига айланди ва шунингдек, XXI асрдаги жаҳон чемпионатларида боши билан гол урган энг паст бўйли футболчи сифатида ҳам қайд этилди.

Opta статистик платформаси хабарига кўра, бўйи 167 сантиметр бўлган Файзуллаев уругвайлик Жоржиан де Арраскаэтага тегишли рекордни янгилади. Бўйи 173 сантиметр бўлган Арраскаэта ЖЧ-2022да Гана дарвозасига бош билан гол урганди.