Эрон Трамп таҳдидларидан сўнг музокараларни давом эттиришдан бош тортди

Доналд Трамп Ҳўрмуз бўғозида кемалар қатнови яна тўсиб қўйиладиган бўлса, Эронни йўқ қилишини айтган.

Фото: ru.apa.az

Эроннинг АҚШ билан музокараларда иштирок этаётган делегацияси президент Доналд Трампнинг таҳдидлари боис музокаралар ўтказилаётган жойни тарк этди, деб хабар берди Tasnim агентлиги.

АҚШ баёнотларида эҳтиёткорроқ бўлиши лозим, зеро Эрон армияси «бошқача жавоб беришга тайёр», деб ёзди Эрон парламенти спикери Муҳаммад Боқир Ғолибоф X ижтимоий тармоғида.

«Наҳотки улар таҳдидлари самарали бўлганида, ҳозиргидек умидсизликка тушиб қолмаган бўлишларини тушунишмаяпти? Биз америкаликларнинг таҳдидларига эътибор бермаймиз», — дея қўшимча қилди у.

Tasnim агентлигининг қайд этишича, Трампнинг баёнотлари АҚШ ва Эрон ўртасидаги ўзаро англашув меморандумининг биринчи бандига зид келади. Унга кўра, томонлар бир-бирига нисбатан таҳдидли баёнотлар бермаслик мажбуриятини олган.

21 июн куни Швейцарияда АҚШ ва Эрон вакиллари ўртасидаги музокараларнинг биринчи босқичи якунлангач, делегациялар маслаҳатлашув учун танаффус олганди.

Трампнинг сўзларига кўра, у эронлик музокарачилар билан боғланиб, Ҳўрмуз бўғозини очиқ қолдиришни талаб қилган ҳамда «Агар уни ёпсангиз, мамлакатсиз қоласиз. Ҳатто лаънати мамлакатингизга қайтиб боролмайсиз» деган.

Трамп Truth Social тармоғида агар Эрон Ливандаги Ҳизбуллоҳ гуруҳини молиялаштиришни тўхтатмаса, АҚШ «ўтган ҳафтадагидан ҳам кучлироқ зарба» беришини ёзди.