Ҳиндистон Хитойни ортда қолдириб, Россия нефтининг асосий харидорига айланди

Ҳиндистон денгиз орқали ташиладиган Россия нефтининг энг йирик харидорига айланди. Июнь ойида Россиянинг денгиз орқали нефть экспортининг 59 фоизи айнан шу мамлакат ҳиссасига тўғри келди, Хитой эса харидларни қисқартиришда давом этди. Бу ҳақда Vortexa таҳлилий компаниясининг июнь ойидаги ҳисоботида айтилади.

Таҳлилчиларнинг баҳолашича, июнь ойида Россиянинг денгиз орқали нефть экспорти суткасига 4,2 миллион баррелга етган, бу 2026 йил бошидан буёнги энг юқори кўрсаткичдир. Экспортнинг асосий қисми Ҳиндистонга тўғри келмоқда. Vortexa ҳисоботига кўра, Хитой нефтни қайта ишлаш заводлари Яқин Шарқнинг арзонроқ нефть навларига ўта бошлаган: июнь ойида Хитойга юқори хавфли нефть импорти 25 фоизга камайган, Шандун провинциясидаги мустақил қайта ишловчилар эса қувватлардан фойдаланишни қисқартириб, харид ҳажмини 26 фоизга камайтирган. Айнан шу минтақа Хитойда Россия, Эрон ва Венесуэла нефтини қайта ишлашнинг асосий маркази бўлиб қолмоқда.

Шу билан бирга, Ҳиндистон Россия хомашёсини харид қилиш ҳажмини оширишда давом этди. Май ойига нисбатан таъминоти яна 27 фоизга ўсди.

7 июль куни Reuters агентлиги Ҳиндистон портларида Россиянинг Urals маркали нефтига чегирмалар эталон Brent навига нисбатан бир баррель учун 10 доллардан ошгани ҳақида хабар берди. Бу ўтган ёздагидан уч-ўн баравар кўпдир, ўшанда Urals Брент’дан атиги 1–3 доллар арзонроқ сотилган эди. Бунга Ҳиндистон нефтни қайта ишлаш компаниялари томонидан талабнинг пасайиши ва муқобил нефть етказиб бериш ҳажмининг ортиши сабаб бўлди. Мартдан июнгача эса, аксинча, Ҳиндистон ва Хитойда Urals нефти Брент’га нисбатан устама нарх билан сотилган.

Бу Яқин Шарқдаги можаро туфайли таъминотда юзага келган узилишлар билан боғлиқ эди. Минтақа мамлакатлари, жумладан, Эрон томонидан экспорт тикланганидан сўнг вазият ўзгарди. Осиёдаги нефтни қайта ишлаш заводларида харид учун кўпроқ танлов имконияти пайдо бўлди, бу эса Россия нефтига бўлган талабни пасайтирди.