Путин Украина билан вазиятни янада кескинлаштиришга тайёр - ОАВ

Reuters нашрига кўра, Путин Россия ҳарбийлари тез орада Донбассни эгаллаб олишига «ишонади».

Фото: REUTERS/Valentyn Ogirenko

Россия президенти Владимир Путин Украина билан тинчлик музокаралари бўйича таклифларни рад этмоқда ва, эҳтимол, можарони кескинлаштиришга ҳаракат қилади. Бу ҳақда Reuters Кремлга яқин учта манбага таяниб хабар берди.

Агентлик маълумотларига кўра, Украинанинг Россия нефтни қайта ишлаш заводларига зарбаларининг кучайиши Путиннинг жанговар ҳаракатларни давом эттиришга бўлган қатъиятини кучайтирди. Россия президенти билан мунтазам учрашиб турадиган Reuters суҳбатдоши яқин ойларда вазиятнинг кескинлашуви «юқори эҳтимоли» борлигини айтди. У бунинг қандай кўринишда бўлишини аниқламади.

Манбалардан бирининг айтишича, Россия президенти Донецк вилоятининг қолган қисмини босиб олиш масаласида «муросасиз позицияни эгаллаган» ва яқинда фронт чизиғида ўт очишни тўхтатишни таклиф этган маслаҳатчилар гуруҳини танқид қилган. Reuters нашрининг бошқа суҳбатдоши таъкидлаганидек, Путин Россия ҳарбийлари тез орада Донбассни эгаллаб олишига «ишонади».

Россия президенти матбуот котиби Дмитрий Песков Reuters материал учун изоҳ сўраб мурожаат қилганида шундай деди: «Россия можарони тинч йўл билан ҳал қилишга тайёр, аммо мустақил ҳаракат қилиш ва махсус ҳарбий операцияни давом эттириш учун етарли салоҳиятга эга».