Livan parlamentida kvorum (ko‘pchilik) bo‘lmagani bois, parlament spikeri Nabix Berri davlat rahbarini saylash muddatini 2 iyunga tayinladi. Bu haqda "Naxarnet" internet-portali xabar qilgan.
Xabarlarga ko‘ra, parlamentning davlat rahbarini saylash bo‘yicha 39-sessiyasida 41 nafar deputat ishtirok etgan. Prezidentni saylash uchun esa parlamentning kamida 86 nafar a'zosi qatnashishi talab etiladi.
Mamlakat, sobiq davlat rahbari Mishel Sulaymonning prezidentlik muddati poyoniga yetgan 2014 yil mayidan beri siyosiy inqirozdan qutila olmayapti. Livan konstitutsiyasiga ko‘ra, parlament tomonidan saylangan nasroniy-maronit prezident bo‘la oladi xolos. Maronitlar katolik cherkovi tarkibiga kirib, ularning aksari Livanda istiqomat qiladi. Mamlakat aholisining 25 foizi ushbu din vakillari hisoblanadi.
Bugungi kunda esa, Livan parlamenti g‘arbparast va suriyaparast teng ikki guruhga bo‘lingan. Livan davlat rahbarligi uchun asosiy nomzod general Mishel Aun bo‘lib, u shialar guruhi "Hizbolloh"ning ittifoqchisi hisoblanadi. Uning bosh raqibi "14 mart" g‘arbparast blokining nomzodi Samir Jaajaa hisoblanadi. Uni "Al-Mustakbal" sunniy partiyasi qo‘llab-quvvatlaydi.
