Janubiy koreyalik KXDRga o‘tmoqchi bo‘lganlikda gumon qilinmoqda

Seul shahri prokuraturasi KXDRga o‘tishga uringan Janubiy Koreya fuqarosiga ayblov e'lon qildi, deb xabar qilmoqda Yonxap agentligi.

Tergovchilarning fikricha, u xavfsizlik to‘g‘risidagi milliy qonun talablarini buzgan. Unga muvofiq, mamlakat fuqarolari hukumat ruxsatisiz shimoliy koreyaliklar bilan aloqa o‘rnata olmaydi. Bundan tashqari, KXDRga foyda keltiradigan xatti-harakatlarni sodir etishga haqlari yo‘q.

Tergov ma'lumotlariga ko‘ra, 54 yoshli erkak 2013 yil sentabr oyida Xitoyga borib, u yerdan Shimoliy Koreyaga o‘tishga muvaffaqiyatsiz uringan. Bir oy o‘tgach, u KXDRning Pekindagi elchixonasiga murojaat qilgan. Biroq, unga rad javobi berilgan. 

Ma'lumotlarga ko‘ra, u 2012 yili Janubiy Koreyada bo‘lib o‘tgan prezidentlik saylovlaridagi qonunbuzarliklarni KXDR OAVga xabar qilmoqchi bo‘lgan.