Shotlandiyada mast holatda reys amalga oshirmoqchi bo‘lgan uchuvchilar ushlandi

Shotlandiya politsiyasi 27 avgust kuni United Airlines aviakompaniyasining mast holatda Glazgodan Nyuarkka (AQSh, Nyu-Jyersi shtati) reys amalga oshirmoqchi bo‘lgan ikki uchuvchisini ushladi. Bu haqda 28 avgustda Press Association axborot agentligi ma'lum qildi. 

Aeroport xodimlari uchuvchilar mast holatda ekanligini payqab qolishgan. Shundan keyin huquq-tartibot muassasalari xodimlari chaqirtirilgan. "Shotlandiya politsiyasi 34 va 45 yoshdagi ikki erkak hibsga olingani tasdiqlay oladi. Ayni vaqtda ular politsiya bo‘limida "Transport xavfsizligi to‘g‘risida"gi qonunning 93-moddasini buzganlik gumoni bilan hibsda ushlanib turibdi", deb aytildi politsiyada.  

Aviakompaniya o‘z uchuvchilarining hibsga olinganini tasdiqladi va "ularni xizmat majburiyatlaridan chetlatganini" e'lon qildi. 

Shotlandiyadan AQShga yo‘l oladigan UA162 reysiga 141 yo‘lovchi ro‘yxatga olingan bo‘lgan. Samolyot uchuvchilar almashtirilgandan keyin o‘z manzili tomon uchib ketgan.

29 avgustda uchuvchilar Peysli shahri sudi oldida javob beradilar. Amaldagi me'yorlarga ko‘ra, uchuvchilar chiqaradigan 100 millilitr havoda 9 mikrogrammdan ko‘p bo‘lmagan miqdorda spirt bo‘lishi kerak.

Xuddi shunday holat Glazgo aeroportida 18 iyulda ham sodir bo‘lgandi. Kanadaning Air Transat aviakompaniyasining ikki uchuvchisi mast holatda ushlangandi. Ular boshqarishi kerak bo‘lgan samolyot Torontoga uchishi kerak bo‘lgan. Uchuvchilar mutassadilarga pasportlarini topshirganlaridan keyin garov puli evaziga qo‘yib yuborilganlar.