Yaponiyada 9 kishi to‘fon tufayli halok bo‘ldi

Yaponiyaga yopirilgan «Layonrok» to‘foni 9 kishini hayotdan olib ketdi. Ivate prefekturasidagi Ivaidzumi shahrida joylashgan qariyalar uyida daryolarning toshqinini keltirib chiqargan to‘fon oqibatida 9 nafar pensionerning jasadi aniqlandi. Bu haqda NHK xabar bergan.

Aniqlik kiritilishicha, qurbonlarning jasadlari mamlakat shimoli-sharqidagi Xonsyu orolidagi qariyalar uyidan topilgan. Qariyalar uyida yashovchilarning o‘limi sababi aniqlanmagan. Voqea joyida huquq-tartibot xodimlari ish olib bormoqda.

«Layonrok» to‘foni tufayli shu vaqtgacha 100dan ortiq reys bekor qilingan. Shuningdek, maktablar faoliyati vaqtinchalikka to‘xtatilib, aholi evakuatsiya qilingan.

Bundan oldinroq, mamlakat bosh vaziri Sindzo Abe Xonsyu oroliga to‘fon yaqinlashayotgani sababli Keniyadagi tashrifini qisqartirgani haqida xabar berilgandi.