Fransiyaning sobiq prezidenti Nikolya Sarkozi prezidentligi vaqtida AQSh maxsus xizmatlari kuzatuvida bo‘lgan. Bu haqda Monde nashri xabar bermoqda.
Bu ma'lumotni Fransiya tashqi razvedkasining sobiq yuqori lavozimli xodimi tasdiqladi. Fransiya tashqi xavfsizligi bosh boshqarmasi sobiq texnik direktori Bernar Barbening aytishicha, 2012 yil mayida fransuz maxsus xizmatlari Yelisey saroyi kompyuter tizimiga o‘rnatilgan zararli dasturni aniqlashgan.
Dastur tahlil qilib chiqilganda, kuzatuv AQSh tomonidan tashkillashtirilgani aniqlangan. Parij Vashingtonga noroziligini bildirgan, buning uchun Barbe shaxsan o‘zi Pentagonga borgan. AQShda esa fransuzlar ularning iziga chiqa olganlaridan norozilik bildirilgan.
Nashrning yozishicha, Fransiya hukumatini ular ortidan eng yaqin ittifoqdoshi kuzatuv olib borgani hayratlantirgan.
