O‘zbekistonda Fransiya vizasi uchun vositachilarsiz hujjat topshirish imkonsiz bo‘lib qolgani aytilmoqda

O‘zbekistonliklar Fransiyaga borish uchun Shengen vizasini olishdagi qiyinchiliklarni muhokama qilmoqda. Tarmoqlardagi e’tirozlardan keyin Fransiya elchixonasi va TLScontact viza markazi bayonot bilan chiqdi.

Bloger Nikita Makarenkoning yozishicha, Fransiyaga viza olish uchun hujjat topshirish vaqtini tanlash amalda imkonsiz va buning qing‘ir yo‘llari paydo bo‘lgan.

“Aytish kerakki, oddiy odam uchun hujjat topshirish navbatini olish deyarli imkonsiz. Bo‘sh vaqtlar hech qachon bo‘lmaydi, ularni oylar davomida kuzatib ham ushlay olmasligingiz mumkin.

Ba’zi odamlar “dasturchilar” xizmatidan foydalanishga majbur bo‘lmoqda. Ular maxsus dasturlar yordamida tizimdagi bo‘sh joylarni avtomatik ravishda band qilib olishadi. Buning narxi 150-200 dollarni tashkil qiladi. Menga esa bir necha bor TLSContact xodimlari orqali navbatni to‘g‘ridan to‘g‘ri 500 dollarga sotib olishni taklif qilishdi. Aytishlaricha, pulini bersangiz, hatto ertangi kun uchun ham navbat topish mumkin”, – deya yozdi Makarenko 24 iyun kungi postida.

Uning so‘zlariga ko‘ra, yaqinda TLScontact markaziga Fransiya biznes vizasi uchun hujjat topshirishga muvaffaq bo‘lgan, ammo u yerda yana bir muammoga duch kelgan: O‘zbekiston hududida tijoriy faoliyat bilan shug‘ullanayotgan oddiy kompaniya (viza markazi) fuqarolarga u yerda mobil telefondan foydalanishni taqiqlamoqda. Gap foto yoki video olish haqida emas, balki oddiy internetdan foydalanish yoki telefon orqali gaplashish haqida bormoqda.

TLScontact xodimlari bu cheklovni Fransiya tomonidan berilgan ko‘rsatma ekanini bildirgan. Ammo Fransiya, deydi Makarenko, O‘zbekiston hududida yurisdiksiyaga ega emas va uning ko‘rsatmalari O‘zbekiston qonunchiligiga zid bo‘lishi mumkin emas.

“Men telefonimga kelgan bitta qo‘ng‘iroqqa javob berdim va qo‘riqchining talabiga qaramay unga telefonimni ko‘rsatmadim. Chunki bu – mening qonuniy huquqim. Natijada menga viza ma’lum cheklovlar bilan berildi.

Fransiya Respublikasi istasa, bu vizani mendan bemalol qaytarib olishi mumkin. Menga uning keragi yo‘q. Yaxshisi, o‘zingiz O‘zbekistonga keling – biz sizni kutamiz va sizga munosabat mutlaqo boshqacha bo‘ladi. Biz sizlar uchun vizasiz rejim joriy qilganmiz. Sizlar esa bizga korrupsiya, navbat va huquqlarimizning buzilishini ravo ko‘ryapsiz”, – deya yozdi bloger.

U mazkur postini e’lon qilganidan bir kun o‘tib, Fransiya tomoni uning vizasini bekor qilganini ma’lum qildi.

Nikita Makarenko ilk postida, shuningdek, iste’molchilar huquqlarini himoya qilish va korrupsiyaga qarshi kurashishga mas’ul tashkilotlarga murojaat qilgan edi.

“O‘zbekiston Raqobatni rivojlantirish qo‘mitasi TLScontact faoliyatini hamda uning ichki qoidalari mamlakat qonunchiligiga qanchalik mos kelishini har tomonlama tekshirishini juda istardim. Shuningdek, mamlakatimizda korrupsiyaga qarshi kurashayotgan tashkilotlardan ham iltimos: TLScontact faoliyati yuzasidan nazorat xaridi o‘tkazing. Shunda ko‘p narsa oydinlashadi”, – degan u.

Shundan keyin boshqa qator blogerlar va ko‘plab tarmoq foydalanuvchilari o‘z sahifalarida va izohlarda Shengen vizasini olishdagi turlicha qiyinchiliklar haqida yoza boshlashdi.

Elchixona munosabati

Fransiyaning O‘zbekistondagi elchixonasi bayonot berib, viza olish uchun ariza topshirmoqchi bo‘lgan shaxslarga xizmat ko‘rsatishga “ustuvor ahamiyat qaratishi”ni bildirdi.

“Jismoniy shaxslar yoki kompaniyalar tomonidan ushbu tartib-taomildan, xususan, moliyaviy maqsadlarda foyda olishga bo‘lgan har qanday urinishlar qat’iyan man etiladi.

Tekshiruvlar muntazam ravishda o‘tkaziladi. Firibgarlik holatlari aniqlangan taqdirda, aybdorlarga nisbatan sanksiyalar qo‘llaniladi”, – deyiladi elchixona munosabatida.

Fransiya elchixonasi o‘zbekistonliklarga viza olish jarayonida norasmiy to‘lovlar talab qilingan taqdirda rozi bo‘lmaslik, Fransiyaga safarni oldindan rejalashtirish, qabulga yozilish uchun bo‘sh sanalar bo‘lmasa, keyinroq qayta urinib ko‘rishni tavsiya qilgan.

TLScontact bayonoti

TLScontact kompaniyasi 26 iyun kuni bayonot berib, 2026 yil 1 iyuldan boshlab Toshkentdagi viza markazida Fransiyaga qisqa muddatli vizalar uchun hujjat topshirish maqsadida navbatga yozilishning yangi tizimi joriy etilishini ma’lum qildi.

“Endi arizachilar qabul sanasini mustaqil tanlab, band qila olmaydi. Buning o‘rniga, bo‘sh o‘rinlar mavjudligidan kelib chiqib, qabul sanasi avtomatik tarzda belgilanadi”, – deyiladi xabarda.

Qayd etilishicha, yangi tizim turistik vizalar (90 kundan kam muddatga) uchun joriy etiladi. Boshqa barcha turdagi vizalar bo‘yicha qabulga yozilish tartibi o‘zgarishsiz qoladi.

TLScontact axborotida keltirilishicha, qisqa muddatli viza olishni istagan arizachilar quyidagi tartibda harakat qilishi kerak:

1. TLScontact saytida ro‘yxatdan o‘tish va ariza uchun zarur ma’lumotlarni kiritish.
2. Ariza tekshirilgach, u qabul qilingani va navbatga qo‘yilgani haqida tasdiqnoma olish.
3. Qabul sanasi tayinlanganda, bu haqda elektron pochta orqali xabar yuboriladi.
4. Xabar kelganidan so‘ng 24 soat ichida servis yig‘imini to‘lab, qabulni tasdiqlash talab etiladi.

“Ushbu tartib viza oluvchilarni firibgarlik bilan shug‘ullanuvchi va xizmatlari qimmat turadigan vositachilardan himoya qilish hamda barcha halol arizachilar uchun qabulga yozilish imkoniyatini adolatli ta’minlash maqsadida joriy etilmoqda”, – deyiladi kompaniya rasmiy axborotida.