Tramp Eronni Ho‘rmuz bo‘g‘ozidagi sulhni buzganlikda aybladi

Trampning so‘zlariga ko‘ra, Eron dronlaridan biri yuk kemasining yuqori palubasiga zarba bergan. U shikastlangan, ammo yo‘lni davom ettira olgan. Qolgan uchta dron amerikalik harbiylar tomonidan urib tushirilgan.

«Bu bizning o‘t ochishni to‘xtatish to‘g‘risidagi kelishuvimizning ahmoqona buzilishi ekani aniq», deb yozdi AQSh prezidenti ijtimoiy tarmoqda.

25 iyun kuni Buyuk Britaniya dengiz savdo operatsiyalari boshqarmasi (UKMTO) Ho‘rmuz bo‘g‘ozidagi Ummon qirg‘oqlarida kemaga hujum uyushtirilgani haqida xabar berdi. The Wall Street Journal nashrining amerikalik manbalariga ko‘ra, kemaga Islom inqilobi qo‘riqchilari korpusi (IIQK) zarba bergan. Hujum tufayli BMT Xalqaro dengiz tashkiloti dengizchilarni Ho‘rmuz bo‘g‘ozidan evakuatsiya qilishni to‘xtatdi.

18 iyun kuni Eron va AQSh o‘rtasidagi tinchlik kelishuvi kuchga kirdi. Ho‘rmuz bo‘g‘ozi orqali erkin kema qatnovi memorandum bandlaridan biri bo‘ldi. 25 iyun kuni IIQK Ho‘rmuz bo‘g‘ozi orqali faqat Eron hukumati tomonidan tasdiqlangan yo‘llar orqali xavfsiz o‘tish mumkinligini ma’lum qildi.