Xameneiy Ahmadinajodga 2017 yilgi prezidentlik sayloviga oid maslahat berdi

Eronning sobiq prezidenti Mahmud Ahmadinajodning bayonot berishicha, u 2017 yilgi prezidentlik saylovida o‘z nomzodini ilgari surmaydi, deb xabar qilmoqda Le Figaro nashri.

U Eron Islom Respublikasining diniy rahnamosi oyatullo Ali Xameneiy Ahmadinajodga prezidentlik uchun kurashmaslikni tavsiya qilganidan so‘ng, shunday qarorga kelgan. 

"Men sizga shuni ma'lum qilmoqchimanki, kelasi yilda prezidentlik uchun kurashmoqchi emasman", - deb yozgan Ahmadinajod Xameneiyga yo‘llagan maktubida. Uning maktubini Eron OAV chop etgan. 

2017 yilning may oyida Eronda prezidentlik saylovlari bo‘lib o‘tadi. 

Ahmadinajod Eron prezidenti lavozimini 2013 yil 4 avgustda tark etgan edi. Uning o‘rnini o‘sha yilning 14 iyun kuni prezident sifatida saylangan Hasan Ruhoniy egallagan edi.