Obama Trampning gaplariga kesatiq bilan javob berdi

Foto: Jimmy Kimmel / Twitter

AQSh prezidenti Barak Obama AQSh prezidenti lavozimiga nomzod Donald Trampning gaplariga komik Jimmi Kimmel shousi efirida izoh berdi. Obama ishtirokidagi bu shoudan parcha boshlovchining tvitter-akkauntida chop etilgan.

Ayni vaqtgacha 8 mingta layk va 6 mingta repost to‘plagan rolikda Obama Mean Tweets rukni doirasida unga foydalanuvchilar yuborgan xabarlarni o‘qiyotganda ular orasida Trampning rasmiy akkaunti @realDonaldTrump’dan jo‘natilgan xabar ham bo‘lgan. "Obama AQSh tarixiga eng yomon prezident sifatida kiradi", deb aytilgan Tramp xabarida.

"Nima ham derdim, @realDonaldTrump, juda bo‘lmasa men tarixga prezident sifatida kiraman", deb javob bergan Obama Tramp hech qachon prezident bo‘la olmasligiga sha'ma qilib. Shundan keyin Obama xabarlarni o‘qiyotgan iPhone’ni yerga tashlagan.