Rim papasi 80 yoshini boshpanasizlar bilan nishonladi

Rim papasi Frantsisk 80 yoshini nishonlash vaqtida Vatikanda Avliyo Pyotr maydoni yonida yashovchi 8 nafar boshpanasizni nonushtaga taklif qildi. Bu haqda The Associated Press axborot agentligi xabar bermoqda. 

Nonushtaga taklif qilinganlar orasida 2 ayol va 6 erkak bo‘lgan. Ular Italiya, Ruminiya, Moldova va Peru fuqarolaridir. Pontifik ulardan har biri bilan suhbatlashib, nonushta bilan mehmon qildi. Shundan keyin papa bir qator yevropalik siyosatchilar bilan uchrashuv o‘tkazdi.

Bayram dasturxoni papa yashaydigan, Vatikandagi "Avliyo Marta uyi" mehmonxonasidagi ovqatlanish zalida yozildi. Mehmonlarga an'anaviy argentin shirinliklari taklif qilingan.

Bu papa o‘z tug‘ilgan kunini boshpanasizlar bilan nishonlayotgan birinchi holat emas. Papa nonushtadan keyin kardinallar bilan ibodatda ishtirok etdi.

Ma'lum qilinishicha, 17 dekabrda muhtojlarga bepul ovqat beriladigan xayriya oshxonalarida pontifik yubileyi sharafiga shirinliklar tortiq qilinadi.

Vatikan matbuot xizmati ma'lumotlariga ko‘ra, Rim papasi ulug‘ yoshga to‘lgani munosabati bilan butun dunyodan 50 mingga yaqin tabrik olgan.